Maundang kaha ni Bato ang shabu?
Si Philippine National Police (PNP) chief Director General Ronald dela Rosa mo- retire na unta karong Enero 21, 2018, atol sa iyang ika-56 nga kasumaran sa adlaw nga natawhan. Apan gipahibawo ni Presidente Rodrigo Duterte nga iyang lugwayan ang pangatungdanan ni dela Rosa og duha ngadto sa tulo ka buwan usa siya itudlo isip director sa Bureau of Corrections (BuCor).
Kon molingkud na siya sa BuCor, nga maoy nagmintinar sa New Bilibid Prison (NBP) ubos sa Department of Justice, iyang maatubang kining mga konbiktadong druglords. Kining mga druglords nagpadayon gihapon sa pagnegosyo og iligal nga drugas gamit ang mga cellphone sulod sa Bilibid.
Kahinumduman nga sa paglingkud sa Duterte administration ilang gipangguba ang mga kubol sud sa New Bilibid ug gipabantayan kini og Speacial Action Force (SAF) apan wa gihapon masulbad ang pagnegosyo sa ginadiling drugas.
Kaya kaha ni Bato ang pagsumpo sa negosyo sa iligal nga drugas sa mga druglords sa maong prisohan? Ang paagi ra gayud sa pagsumpo niini mao ang pag-imbargo sa mga cellphone ug ubang gadgets nga magamit nila pagtawag sa ilang mga kontak sa gawas. Gikahadlokan usab nga adunay mangamatay nga mga
druglords kon dili sila magpatuo sa kasugoan ni Bato. Motiyabaw na usab unya ang mga human rights groups.
Sigun sa atong gipaabot naaprobahan ang gipangayo ni Presidente Duterte nga usa ka tuig mga lugway sa martial law sa Mindanao nga matapus na unta karong katapusan sa 2017.
Sa joint session sa kongreso atong nadunggan ang taga-Mindanao nga uyon kaayo sa pag- extend sa martial law.
Sila maoy labing maapektuhan sa mga kalihukan sa mga terorista ug mga rebelde nga padayon gihapong nanghasi didto sa Mindanao.
Giapil usab sa presidente ang problema sa New People’s Army (NPA) nga kanunay mangataki sa kampo sa militar ug kapulisan. Ako nagtuo nga kini makapakurog sa mga kumonistang NPA labi na kon gamiton ang abyong igugubat aron pagbomba kanila.
Hinaut pang daghang mga mayor ang mosuporta niining pagpaluyo ni Cebu City Mayor Tomas Osmeña sa habal-habal kun angkas. Hinaut untang ang mga habal-habal moapil sa Angkas o kaha lain nga kahugpongan aron ma- standardize ang motorcycle-for hire.
Ako mo-insister nga ang local government units (LGUs) maoy angay hatagan og katungod sa pag- manage sa ilang transport system apil na ang mga motorcycle-for-hire kon habal-habal.
Nangisug ang Land Transportation Franchising and Regulatory Board (LTFRB) nga iligal kining habal-habal. Apan anaa bay laing kasakyan ang katawhan sa kabukiran ug sa hilit-hilit nga mga dapit nga layo sa kadalanan? Angay nga sabtun sa LTFRB ang kalisud sa katawhan kalabut sa sakyanan inay mag-inistrikto.