3RD BRIDGE PASPAS NGA GIAPROBAHAN

Katumanan sa damgo ni kanhi Cordova mayor ug karon Presidential Adviser on Legislative Affairs Adelino Sitoy ang katukoran sa ikatulong taytayan nga magsumpay sa dakbayan sa Sugbo ug lungsod sa Cordova.

Ang kanhi damgo ug giisip nga komedya, nga wala na moagi sa National Economic and Development Authority (Neda), Department of Public Works and Highways (DpWH) ug Regional Development Council (RDC), paspas nga ning -irog karon pinaagi sa PublicPrivate Partnership (PPP).

Kagahapon, gihimo ang ceremonial nga paghatag sa Notice of Award sa P22.6 bilyones nga kontrata alang sa pagtukod sa Cebu-Cordova Link Expressway nga sugdan sa ikaduhang quarter sa 2018 ug gipaabot mahuman sa 2021.

Si Rodrigo Franco, presidente ug chief executive officer sa Metro Pacific Tollways Corp. (MPTC) ang nitunol sa kopya sa Notice of Award sa kontrata ngadto sa Acciona Construccion Southeast Asia Director Ruben Camba, nagrepresentar sa Cebu Link Joint Venture, consortium sa contractor nga nagbase sa Espanya ug First Balfour Inc., ug D.M. Consunji Inc., nga pulos nagbase sa Pilipinas.

Ang kalihokan gisaksihan ni Cebu City Mayor Tomas Osmeña, Sitoy, ug anak niini nga si Cordova Mayor Mary Therese Sitoy-Cho.

Matod sa presidential adviser nga 27 ka tuig na niya nga gidamgo ang ikatulong taytayan niadtong panahon dihang giplanohan ang pagtukod sa Marcelo Fernan Bridge.

Si Sitoy nipaambit nagsugod kini dihang nakadawat sila og “unsolicited offer” gikan sa MPTC niadtong Agusto 2014 dihang siya pa ang mayor sa Cordova nga magtukod kini og taytayan.

Napasayon ang proseso gumikan sa ordinansa sa lungsod bahin sa PPP.

Siya nisugilon nga nilahos sila kang Presidente Rodrigo Duterte pagpahibawo sa proyekto ug wala na moagi sa Neda, DPWH ug RDC.