Matamata sa kaadlawon

Nakasuway ka ba og mata tungang gabii o kadlawon unya maglisod na og balik og katulog? Kadtong nakasuway ani, segurado ko nga maka-relate.

Matod sa mga edad-edaran sa Tsina kansa hangtod karon naggamit sa kinaraang paagi sa pagpanambal, ang atong kinatulgan ug pagmata-mata sa kadlawon dunay mensahi nga dili ibaliwala ug makapakita sa emosyonal ug pisikal nga estado sa panglawas.

Pananglitan, naglisod ka og piyong sa imong mata o katulog gikan alas 9:00 hangtod na sa 10:00 sa gabii, simtomas kini nga stressed ka, posibli sa imong trabaho, panglawas o ka relasyon.

Kung kini mahitabo, bansaybansaya ang meditation pinaa- sa pag piyong sa mata ug ginhawa og lawom (10 ka bisis) para mapaguwa ang tensiyon og hugaw nga hangin sulod sa lawas dayon maka-relax.

Sa akong kasinatian, kung nagsiga pa akong mata bisag ting katulog na, ako kining imnan og init nga tsa (Chamomile tea) parisan pagpaminaw og hinay nga mga sonata, dayon akong hiluton akong agtang ug ulo samtang maghanduraw sa mga maanindot nga dapit nga akong nasuruyan og gustong maabot.

Kung maka mata sab sa tungang gabii, mga alas 11:00 ngadto na sa 1:00 sa kadlawon, ang pasabot ini duna kay gikumkom nga kahi-ubos ug kayugot sa imong dughan. Tambag sa mga edarang insik, bansay-bansaya, bisag unsa ka lisod, ang pagpangayo og pasaylo ug hangupa pagdawat ang imong pagka ikaw.

Kung maka mata kag tunga-tunga sa 1:00 hangtod na alas 3:00 sa kadlawon, nagpasabot kini nga naa kay gi luom nga kasuko ug kalagot nga nag-anam og ka bug-at. Kining gibati nga negatibong enerhiya sa emosyon adto mo paingon sa atay busa angay kining imnan og bugnaw nga tubig sundan og meditasyon.

Kung alas 3:00 ngadto sa 5:00 sa Kadlawon, pasabot ini duna kay gibati nga mga kaguol ug kahingawa nga nagsamok-samok sa imong panumduman. Imong buhaton, ginhawa og lawom sa makadaghan dayon mangadye.

Sa imong pagmata, bagta sa kalipay ug hangupa pagpasalamat ang gasa sa bag-ong adlaw sa pagpanlimbasog.