Reklamo sa Uber
Atong gihangop kining pagbalik og operate sa usa sa ride-sharing company nga mao ang Uber human kini suspensuha og dul-an sa usa ka buwan ug ingon man gipamulta og hapit tunga sa bilyon ka pesos sa Land Transportation Franchising and Regulatory Board (LTFRB). Ang pagkasuspenso nagagumikan niadtong padayon nilang pagpanawat og mga aplikante og mga driver/owner sa mga pribadong sakyanan nga mamahimo nilang partner bisan pa man og gidid-an na kini sa LTFRB.
Tuod man sa ilang paghibalik, nakatabang kini og dako ngadto sa riding public ilabi na sa peak hours tungod kay sa kadaghang sumasakay dili na maserbisyohan og ensakto sa ilang kopetensiya nga mao ang Grab.
Pero nia may laing reklamo kalabot ning serbisyo sa Uber. Duna man sab diay higayon nga mopahamtang sila og penalty ngadto sa ilang pasahero.
Ang penalty ilang ibase kon ang pasahero nga mi-book ngadto sa ilang driver wa modayon og sakay o ang driver mismo wa makatultol sa destinasyon diin unta niya kuhaon ang pasahero o ba kaha sa ubang rason.
Kinahanglan ikanselar sa pasahero ang booking ug ingon man usab ang sa driver.
Kon dili makanselar, mao na ni higayon nga mo- charge sila ngadto sa pasahero bisan pa man og wa kini nila maserbisyohi.
Dili dihadiha dayon nila makuha ang gi- charge kon dili idugang kini sa imong pletihan sa sunod higayon nga mosakay na usab ka sa Uber.
Dili ba unfair man kini sa pasahero? Pabayron bisan og wa maserbisyohi?
Usa sa mga mireklamo nga dako niyang katingala nga siya pa ug ang iyang pamilya ang natagbaw og huwat sa Uber nga sa kalit lang wa motunga ug siya pa ang gibutangan og charge.
Maayo siguro og susihon ni sa LTFRB da.