Unsay angay andamon sa Pasko?
Puwerting inandamay alang sa Pasko. Oktubre pa lang namalibad na ang nagnegosyo'g litsong baboy ng dili na sila modawat og order alang sa Pasko ug Bagong Tuig. Kay fully booked na ilang listahan. Ug wala nay baboy nga maihaw ug malitson. Porbida, no? Nahibalo na man unta ta nga ang pagpatuyag kaog baboy makahayblad ug makamatay. Apan sold out gihapon!
Higala kong pari miadto sa mall aron mopalit of Pamaskong adurno alang sa altar sa simbahan. Apan ang iyang naibgan nga gustong paliton, nahurot na. Pastilan, no? Hasta plastik nga mga dahon ug mokidlapkidlap nga mga suga gikuninitan! Ultimong pobre, bisag nagnihit, naninguha gyong makapalit.
Pagsugod pa lang sa Adbiyento, namalit na ang mga tawo sa nagkalainlaing butang nga makalipay nila panahon sa Pasko. Gikan sa ukay-ukayan ngadto na sa mga dagkong tindahan, naghuot ang mamalitay. Usahay, moawas pa...tungod kay nagkapuliki lagi sa mga pamaskong panginahanglan nga ilang giandam alang sa ilang mga kinugos. Apan, tan-awa ang simbahan gikan sa Lunes ngadto sa Sabado, napuno ba sa manimbahay ang mga lingkoranan? Hain ba diay ang mga importante nga andamon ning nagsingabot nga Pasko: ang mga butang lang ba diay nga makalipay sa lawas, o ang pagpanglimpiyo sa atong tanlag nga makahatag og kinabuhing dayon sa atong kalag? Timan-i, nga ang lawas ray madugta samtang ang kalag magpabiling buhi hangtod sa kahangtoran. Na'an unsay imong pilion?
Kada adlaw may gigahing oras ang pari nga molingkod sa kumpisalan aron magpaabot kinsay mangumpisal. Apan subo kaayong palandungon nga lamukon na lang intawon ang pari sa paghinulat ug pipila lang ang misanong sa tanyag sa Diyos.
Ning pag-abot ni Kristo sa Pasko, iyang gi-offer ang kaluwasan natong mga makasasala. Busa, angay nga andamon nato ang atong kaugalingon. Limpiyohan ta sa mga sagbot kining templo nga iyang gipahulaman nato aron atong matagamtaman ang tinuoray nga himaya diha sa pagpangandam. Mga igsuon ko, mangumpisal ta! Oo, magbag-o na kita sa atong kinabuhi.