Laing pamilya
Dear Noy Kulas,
Daghan kog problema sa kinabuhi pero ako lang gikaya ang tanan kay dako ko og pagtuo sa Ginuo. Pero bisan ang guma dunay kinutoban gani, unsa na kaha ang tawo.
Tagoa lang ko sa ngan nga Ging, 50 years old na. Ang akong bana toa sa abroad nagtrabaho ug igo ra siyang nag support namo kay makauli siya tinuig. Bisan sa uyab pa mi, playboy na siya. Nagtuo kong mausab ra siya mao nga ako siyang gidawat pag propose niya sa akoa. Wa ko magduha-duha kay love nako siya. Pero nasayop ko.
Dihang nakaanak na mi og duha, nilarga siya aron kuno mahatagan mi og maayong ugma. Nisugot ra ko kay nagtuo kong few years ra. Karon nga guwang na mi, sige ra gihapon siya sa abroad. Mao diay kay naa siya laing pamilya na didto. Duha na ang ilang anak sa babaye ug kasado sila.
Nakahibawo ko tungod kay ang babaye ang ni chat nako ug ni email sa pictures. Mao diay nga tag-usa ka buwan ra siya mopuyo sa amoa unya molarga dayon. Unsaon, Pinay ra man ko unya iyang second wife kay puti.
Pagkahibawo nako way kabutangan ang akong kasuko ug kahiubos niya. Ako siyang gipapauli pero wa siya mosugot kay di pa siya ready. Akong gisultihan ang among mga anak kay dagko na man, makasabot na bahin ani. Kon unsa ko kasuko, mao sab sila. Karon, nasuko ang akong bana nganong nagpahibawo ko sa among mga anak. Di na kuno siya mopauli sa amoa kay mauwaw siya nga moatubang sa among mga anak.
Noy, wa ko magsalig niya kay naa man koy maayong work ug ginagmay nga negusyo. Ang ako lang unta magprangkahay ming duha ug mag estorya sa maayo kon unsa may among sitwasyon. Unsa kaha kon ako ang molarga aron ako siyang komprontasihon didto? Maayo kaha? Please tambagi ko.
GING Ging,
Kon makaya nimo ang paglarga, himoa aron matubag ang daghan nimong mga pangutana. Apan ayaw una ron tungod kay naa ka pa sa tumang kasuko. Unya na og mo subside na ang imong kasuko una ka molarga. Let it sink in unya huna hunaag maayo ang sitwasyon ug kon unsay imong buhaton.
Mas maayo nga imo usab nga kuhaon ang baruganan sa inyong mga anak ning mao nga sitwasyon kon mokalma na usab sila. Kana usab lagi kon moinsister ang imong bana nga di siya mopauli kay di siya makaako sa pag atubang sa inyong mga anak.
Sa pagkakaron, pray for God’s guidance.
NOY KULAS