FINALS NA!
Duwa karon 5:00 pm- UC batok UV (College Finals) Kulbahinam ug makapaukyab nga kombati ang gilaumang masaksihan sa panagharong sa defending champions University of the Visayas (UV) Green Lancers ug University of Cebu (UC) Webmasters sa college division finals series sa Cebu Schools Athletic Foundation Inc. (CESAFI) nga sugdan karong hapon sa Cebu Coliseum.
Dili ikalimod nga grabe ka inilog ang Green Lancers ning kombatiha gumikan sa mas solido nilang puwersa ug kasinatian.
Apan giklaro ni Green Lancers coach Gary Cortes nga dili kini sayon nga tahas alang kanila hilabi na kay taas ang moral sa Webmasters gumikan sa kasinatian niini sa semi-finals diin nalutsan nila ang grabe ka lisod nga misyon.
Matod ni Cortes nga sa iyang nakita kon giunsa pagpapha sa Webmasters ang twice-tobeat nga bintaha sa University of San Jose Recoletos (USJR) Jaguars sa semi-finals, nasayod siyang dili bastabasta ang ilang ikaharong sa finals bestof-three series.
“Maayo ni nga match-up kay mi-improve man gyud ang duwa sa UC. Dili magmahay ang mga manan-aw ani nga series, kombati gyud ni,” matod pa ni Cortes sa sayong interbyu.
Nidugang si Cortes nga andam silang mosagubang bisan unsa nga klase nga kombati ang ihatod sa Webmasters ni coach Raul “Yayoy” Alcoseba ning ilang panagparang.
“Kahibalo man ta basta si coach Yayoy, dili na bastabasta magpapilde maong nangandam gyud mi’g maayo ani,” dugang ni Cortes.
Mismong si Alcoseba nakamatikod nga nahangop na sa iyang mga magduduwa ang sestima nga iyang gipatuman sa bag-o niyang puwersa ug malipayon siya niini.
“Pag-abot gyud nako dinhi, ako gyung gi-instill sa players ang winning attitude,” asoy pa ni Alcoseba, kinsa kanhi coach sa Southwestern University (SWU) Cobras.
Gilaumang mokawat og dakong atensyon sa series mao ang panagparang sa imports sa duha ka mga kampo nga sila si Basseiru Sackor sa Green Lancers ug Frederick Elombi sa Webmasters.
Dili ikalimod nga mas eksplosibo ang abilidad ni Elombi apan mas lawom ang lokal nga suporta ni Sackor nga maoy nakahatag og balanse ning maong panagparang.
Gawas ni Sackor, ang Green Lancers makasandig og insakto sa abilidad nila ni
MVP Rey Suerte, Tristan Albina, Jerome Napao, Josue Segumpan ug Jan Soliva.
Sa ilang bahin, ang Webmasters mosalig sab nila ni Justine Dacalos, Mark Olmilla, Garciano Puerto, Joren Tagudin ug John Calvin Jabello.
Ang Webmasters wala nakatilaw og daog sulod sa duha nila ka mga engkuwentro batok sa Green Lancers apan nakasukol kini og insakto.
Sa premirong sangka niadtong Agusto 13, gibuntog sa Green Lancers ang Webmastes, 72-61, unya mingdaog na sab ang Green Lancers sa ikaduhang kombati niadtong Septiyembre 10, 65-62.