You’re my destiny
Gisunod ko ang gitambag ni Glenda nako. Midawat na kog mga suitors. Tulo ang nangulitawo nako. Sila si Remon, Jonjon ug Jake. Pulos sila guwapo. Sila si Jake ug Remon mga anak og dato parehas kang Rodell. Si Jonjon lang ang matawag nga anak og ordinaryong mga ginikanan. Samtang sila si Jake ug Remon pulos datong mga negosyante ang mga ginikanan, si Jonjon anak og ordinaryong empleyado. Ang iyang Mama clerk sa usa ka opisina sa siyudad. Ug ang iyang amahan nagtrabaho isip janitor sa usa ka pabrika.
Dasig sila si Jake ug Remon samtang hilumon si Jonjon. Morag kanunay dunay problema nga gihunahuna.
“You know, Jon, sa paniid ko nimo, may naghasol nimo?”
Kausa nga namisita si Jonjon nako, wa na gyud ko makapugong sa pagpangutana niya.
“Di man gyud kalikayan nang problema, uy, Malou, labi na parehas nako nga dunay pangandoy sa akong
future. Lisod man gyud ning magpaeskuwelag college labi nag di sab mi haruhay sa financial.”
Miyangu-yango ko. Husto man sab si Jonjon. Sa iyang sulti nako, tulo silang magsuon, siya ang kamagwangan ug ang duha niya ka manghod nag-eskuwela sa hayiskol.
“Di parehas nilang Jake ug Remon nga mga dato. Lupig gyud ko nila.”
“Lupig sa unsa? Aw, sa pagkabutang may rason ka.”
“Sa tinguha namong tulo nimo, Malou.”
“Di man ko ingon anang pagka babaye.” Nasabtan ko si Jonon. “Wa ko magbase sa sitwasyon sa pagkabutang sa tawo kon bahin na sa love. Nuon, may higayon sab nga magkaatol ang babaye sa pagpakigrelasyon sa usa ka opposite sex. Gisugot niya ang laki kay nakagusto siya ani, at the same time, anak sab siyag datong mga ginikanan.” Nahilom SI Jonjon. “Di dali para nako ang paghukom ninyong tulo, Jon. Di ko gusto nga mosugot ko bisan kinsa ninyo nga wa koy love nga gibati. Gusto nako nga kon kinsa man ang sugton ko ninyong tulo, kanang love gyud nako siya.” “Bitaw, Malou. Husto ka gyud ana. Di man sab ko gusto nga ang akong girlfriend nagduwa-duwa lang sa akong gugma niya. Nga di true love ang iyang feeling nako.” “Correct kaayo ka ana, Jon.” Igo lang nakapauli si Jonjon, namisita si Jake nako.
(SUMPAYAN)