Garbo sa Sugbo

Talagsaon ang kalamposan sa mga graduwado sa University of Cebu (UC) nga nikuha sa ulahing licensure examination sa Naval Architect and Marine Engineer human 12 ka mga tinun-an sa UC nasulod sa top 10. Nag-una si Jayvie Orbeso Albarando sa rating nga 89.80 percent. Nisunod si Randolph Diez Tabernero, 89.60%. Nagtabla sa ikatulo sila si Reanne Pil Mangubat ug Lyndon Hanz Pitogo Pernites, 89.40%. Ikaupat si Vince Alex Entoma Villahermosa, 89%. Ikalima si Lendon Saquez Arcillas, 88.80%.

Ikaunom si Jochelle Potot Tumulak, 88.50%. Ikapito, si Brylle Larida Enad, 87.20%. Ikawalo si KC Rare Baliquig Emnace, 86.90%. Ikasiyam si Christakhis Niño Limjap Nodalo, 86.50%. Nagtabla sa ika-10 mao sila si Kit Boniefel Almonte Bontor ug Charisse Ivy Condrillon Talle, 85.90%.

Dili tiaw ang kalipay sa mga tinun-an ug ang tagdumala sa UC isip institusyon sa edukasyon nga nagpakita sa kalidad sa ilang produkto.

Seguro, unang higayon kini sa kasaysayan sa licensure examination sa nasod nga giharos ang top 10 sa usa lang ka tunghaan.

Ang dungog nga nakab-ot sa UC, dakong garbo usab sa Sugbo. Nagpaatuod kini nga nahimotang dinhi ang mga dekalidad nga tunghaan.

Daghang ubang tunghaan sa Sugbo ang kanunay mo-top o dunay masulod sa top 10 sa licensure examination sama sa medisina, nursing, abogasiya, edukasyon ug uban pa.

Ang board ug exam kabahin lang sa teyorikal nga paghashas sa kahibalo human sa hataas nga proseso sa pagkab-ot og edukasyon, apan ang kahanas nga paggamit sa kahibalo sa aktuwal nga karera sa kinabuhi maoy matuod nga sukdanan nga maghingpit sa kalamposan.

Congratulations sa top notchers ug board passers. Congratutions UC.

Matuod kamo nga garbo sa Sugbo.