Laing kontrata nakuha sa Pamocor

Gipaubsan lang og P6 sa Pasajero Motor Corp. (Pamocor) ug naangkon na usab ang P26.8 milyones nga kontrata sa paghakot sa basura para sa buwan sa Agusto pinaagi sa emergency procurement sa dakbayan sa Sugbo.

Ang Bids and Awards Committee (BAC) nipahigayon og canvassing nga giapilan sa tulo ka mga service provider lakip na ang Pamocor nga gipanag-iya ni Kapitan Franklin Ong sa barangay Mabolo nga suod nga higala ni Mayor Tomas Osmeña.

Matod ni Ronald Malacora, chairman sa BAC, ang Pamocor maoy labing barato sa tulo ka service providers diin P1,327 ang ilang gitanyag nga presyo nga mas ubos kon itandi sa P1,330 sa Jomara ug P1,350 sa triple J nga taga Lapu-Lapu.

Ang Pamocor mao sab ang nidaog sa bidding sa P40 milyones para sa Hunyo 6 hangtod Hulyo 27 nga paghakot sa basura gikan sa transfer station paingon sa landfill sa Consolacion nga nagbalor og P1,333 matag tonelada diin gi-disqualify sa BAC ang Jomara gumikan sa tax clearance.

Matod ni Malacora nga nitugot na si Osmeña nga adto kuhaon ang P26.8 milyones sa P151 milyones nga giaprobahan sa konseho ilawom sa

supplemental budget (SB1) sanglit gi-defer sa konseho og usa ka semana ang pag-aproba sa paggamit sa kwarta sa Pagcor sa samang katuyoan.

Gipadayag ni Malacora nga sa tungatunga sa Agusto, makapahigayon na sila og bidding sa P154 milyones nga nahabilin sa pundo para sa basura ilawom sa SB1 hangtod Disyembre 31.

BASURA NAGTIPUN-OG

Apan sama wala maibani ang gidaghanon sa basura sulod sa transfer station sa barangay Inayawan bisan pa man sa paghakot sa Pamocor. Si John Paul Gelasque, assistant department head sa Department of Public Services, nagkanayon nga ang maong mga basura mao ang kanhi pundo nga wala pa mahakot.

Gipadayag ni Gelasque nga nipahigayon una sila og emergency procurement diin ang Pamocor maoy nidaog aron paghatag og igo nga panahon nga makapahigayon og bidding.