Bihag, planted?

Duha ka managlahing suspek ang gipang-aresto kalabot sa kamatayon sa call center agent nga si Aireen Adolfo, 24, kansang lawas napalgan sa kasagbutan nga bahin sa Brgy. Pulangbato, Cebu City sa niaging semana. Unang gisignit sa kapulisan sila si Sherwin Velasquez ug Ramonito Tribunalo nga pulos habal-habal drayber.

Kini si Tribunalo gibuhian kay way ebidensiya pero si Velasquez pabilin nga gitanggong ug maoy giila nila nga prime suspect tungod sa bihag nga manok nga nakit-an duol sa dapit diin gipatay si Adolfo.

Sa sayo pa, hugot nga gipanghimakak ni Velasquez ang pasangil sanglit, matod pa niya, didto siya sa derby sa Mandaue Coliseum atol sa maong hitabo.

Sa niaging adlaw, ang NBI, mipresentar usab og laing suspek. Ning higayona, laing habal-habal drayber nga si Francisco Capalaran, 47, ang gikustodiya sa NBI.

Dunay saksi ang NBI nga nagtumbok kang Capalaran nga maoy gisakyan nianang gabii sa wa pa mapatay si Adolfo. Ang saksi, usa ka babaye suod nga kaila ni Capalaran. Pero unsa ka tinuod nga ang bihag nga nakit-an didto sa dapit diin gipatay si Adolfo, pinangayo diay sa pulis gikan ni Velasquez.

Matod sa tinubdan, nianang Martes sa gabii, samtang si Velasquez padayong gitanggong sa prisohan sa Talamban, dunay pulis nga nangayo kaniya og bihag.

Iya kining gihatagan ug gipaadto sa balay aron ipakuha ang bihag kinuyogan sa ig-agaw ra usab ni Velasquez.

Unsang pagka unsaa nga nianang pagka Miyerkules, mao na lay nabalita nga dunay bihag nga nakit-an duol sa dapit diin gipatay si Adolfo, butang nga gikasurprisa sa mga kaliwat ni Velasquez.

Kini maoy angay siguro sutaon ni Cebu City Police chief Supt. Joel Doria kon duna bay nagbinuang sa iyang mga tawo aron paglubog sa hustisyang gipangayo sa tagtungod sa gipatay.