Extension sa Martial Law

Mapupos na karong Sabado, Hulyo 22, ang deklarasyon sa Martial Law sa tibuok Mindanao base sa gimbut-an sa Batakang Balaod nga sulod lamang kini sa 60 ka adlaw.

Gideklarar ni Presidente Rodrigo Duterte ang Martial Law sa Mindanao niadtong Mayo 23, 2017 human gi-ataki sa teroristang Maute Group ang Marawi City diin hangtod karon nagpadayon pa gihapon ang gubat tali sa militar.

Pinasikad sa Section 18, Article 7 sa 1987 Constitution, adunay gahum ang Presidente nga modeklarar ug Martial Law sa tibuok nasud o tipik ug kabahin niini kon gikinahanglan aron pagsumpo sa lawlessness, invasion ug rebellion o kon gikinahanglan ang siguridad sa publiko.

Ang Korte Suprema, pinaagi sa 11-3-1 nga botasyon, mideklarar nga legal ug constitutional ang deklarasyon. Onse ka mga mahistrado ang misuporta, tulo ang mi-ingon nga sa Marawi City ra unta ang deklarasyon samtang usa ang misupak. Ang Kongreso, pinaagi sa joint session, aduna poy gahum sa pag- review sa deklarasyon apan wala motuki niini.

Karon, gusto ni President Duterte nga lugwayan ang deklarasyon sa Martial Law hangtod sa December 31 karong tuiga. Mao nga nanghangyo siya sa Kongreso nga lugwayan gumikan kay matod pa sa Presidente wala pa gyud kompletong masumpo ang rebelyon sa Marawi City.

Sa iyang suwat-hangyo ngadto nila ni Senate President Aquilino Pimentel III ug House Speaker Pantaleon Alvarez, mihangyo ang Presidente nga lugwayan ang Martial Law kay sa pagkakaron, dili pa igo ang 60 ka adlaw aron masumpo ang rebelyon didto sa Marawi City ug tibuok Mindanao.

Ang extension sa Martial Law mamahimo na usab kining debate sa Kongreso ug gamiton na usab kining basihanan sa mga mosupak niini nga mohimo ug mga demonstrasyon o rally. Unya ang mga nagsaba-saba batok sa ML ang dili ra ba taga Mindanao.

Mas malipay pa ang mga tawo didto nga magpabilin ipa-ubos ang Mindanao sa Martial Law kay alang kanila, mas luwas sila sa presensiya sa militar.