Misaka sa atop sa mall kay way ikaplete pauli
Misaka sa atop sa usa ka dakong mall ang construction worker nga giingong wa nay ikaplite pauli sa Mindanao.
Kini nahitabo kagahapon sa buntag sa Robinsons Galleria nga nakamugma og kaguliyang sa dapit.
Kapin sa duha ka oras niya nga pag-estar sa atop ug gikahadlukan nga basin kini og moambak,
Apan nadakpan ra gihapon sa kapolisan si Roberto San Antonio Mimay, 28, nga taga Butuan City, Agusan del Norte.
Sa imbestigasyon, pasado alas says naabot sa mall si Mimay sa pasumangil nga moadto sa usa ka opisina sulod sa mall.
Gibalibaran unta kini nga makasulod, apan kalit kining midagan sulod sa tindahan nga wa na igkita sa mga security guard.
Wa magdugay mao na lay nakit-an sa mga tawo nga atoa na sa atop si Mimay.
Naalarma ug naabot ang kapolisan ug kabomberohan sa maong dapit aron pagresponde.
Gamit ang aerial ladder gi-kombinser si Minay sa pagkanaug gikan sa iyang gilingkorang ngilit sa atop sa mall nga gibana bana nga may kapin sa 50 ka tiil ang gitas-on.
Wa siya makabantay nga inanay nga mikamang sa atop sila si PO1 Ryan Cresilda ug PO2 Jenifer Torregosa sa Waterfront Police uban sa mga gwardya sa mall nga maoy kalit misignit kaniya.
Sa dihang gisukit-sukit, si Mimay miingon nga wa na siyay ika plite sa ila hinungdan nga gusto siya magpakamatay.
Namatikdan usab nga mag usab usab ang mga pamahayag ni Minay.