MAMA, ANAK GIKILATAN

INAHAN NAMATAY; ANAK, MANANAGAT NAANGOL

Patay ang usa ka 77-anyos nga inahan human naigo sa kilat samtang paingon sila sa Barangay Pooc, lungsod sa Sta. Fe, isla sa Bantayan kagahapon sa buntag.

Nangaangol usab ang iyang anak ug ang mananagat nga nagtimon sa pumpboat.

Matod ni Sta. Fe Mayor Jose Esgana nga paingon na nga modunggo ang gisakyan niini nga pumpboat gikan sa Barangay Langub, isla sa Kinatarcan.

Ang biktima naila nga si Marina Necesario, kinsa gisuwayan pa pagtabang sa duha ka langyaw nga turista pinaagi sa cardiopulmonary resuscitation

(CPR) apan wala na kini nadala.

Lakip sa naangol ang anak niini nga si Rolly, 38, kinsa nakaangkon og samad sa iyang wala nga aping, dunggan nga kasamtangan karon nga nagpaalim sa Bantayan District Hospital. Samtang si Ranel, 34, kinsa

operator sa pumpboat nalipong apan wala ra kini makaangkon og samad gikan sa liti.

Dugang ni Esgana nga nahinabi sa Superbalita Cebu nga anaa na sila sa dapit duol sa Kota Beach Resort ug Marlins Beach Resort.

Nasuta nga nagmaniobra na paingon modunggo ang ilang pumpboat dihang nahitabo ang insidente pasado alas alas 9:00 sa buntag kagahapon.

Nasayran nga gikan sa isla Kinatarcan ang pamilyang Necesario sa wa pa ang hitabo.

Gikan sa mainland sa isla sa Sta. Fe, modagan og usa ug tunga sa oras ang biyahe gikan sa Kinatarcan Island.

Matod ni Esgana nga nakasinati sila og pag-uwan ug kilat kagahapon hinungdan nga nahitabo ang insidente.

Moabag hinuon ang lokal nga kagamhanan sa Sta. Fe alang sa pamilya sa biktima.

Gibutyag ni Esgana nga P3,000 ang mamahimong madawat sa pamilya sa biktima nga namatyan isip financial assistance.