Police sa Opao ipabalhin ni Quisumbing
Gitataw ni Mandaue City Mayor Luigi Quisumbing nga nipadayag og pasalig si Presidential Assistant for Visayas Michael Dino nga mabalhin ang Opao Police Station kinsa kasamtangang nahimutang kilid sa Opao creek nga delikado panahon sa kusog nga uwan.
Matod ni Quisumbing nga nakig-istorya na siya ni Dino niini aron sa paghangyo sa Department of Interior and Local Government (DILG) nga mopalit og luna alang sa police station.
“Ni- commit si Secretary Dino nga he will find a way nga on next year’s budget sa DILG makapalit na og yuta ug makatukod na bag-ong police station sa dapit kay kanang area baya that needs extra police presence because it
is densely populated,” matod ni Quisumbing sa mga tigbalita.
Sumala sa mayor nga naluoy siya sa sitwasyon sa Opao Police Station.
Ang maong problema daan na nga nasinati sa kanhi administrasyon ni kanhi mayor Jonas Cortes.
Plano na unta nga gub-on ang maong police station niadto apan ang dakong problema niini mao kon asa kini mahimong ibalhin.
Sa panahon ni Cortes, ang dakbayan makahatag og relokasyon sa maong police station apan mausab ang jurisdiksyon niini tungod kay mabalhin man kini sa laing dapit ug dili sa Barangay Opao.
Nalipay si Quisumbing sa pagtabang ni Dino. Ang mayor niangkon nga lisod ang pagpangita ug pagkuha og luna aron kabalhinan sa police station.