Kon uwahi na

Mag-usa na ka buwan sukad niulbo ang gubat sa Marawi City apan hangtod karon, wa pay nakitang kahayag kanus-a kini mahuman. Naglisod ang kasundaluhan sa pagkombate tungod sa ilang kakuwang sa mga sakop nga gibansay sa urban nga gubat.

Sa wa pa sulnga ang Marawi City, duna nay intelligence reports nga atakehon ang siyudad base sa bahad nga nakuhaan og video nga nasakmit usab sa mga awtoridad.

Di ang Marawi maoy unang gisulong sa mao nga grupo. Sukad kini natukod ug nakabaton og igong kusog, daghan nang mga dapit sa Mindanao ang giatake niini.

Kon ang bahad niini sa Marawi City gituohan pa dayon, hayan dili ingon niini ka malampuson ang pagpangatake kay makapangandam ang tanan.

Di baya katuohan nga way nasayod sa planong pagpangatake. Ang wa lang tingali nila mabuhat mao ang pagtuo nga tinud-on sa Maute group ang ilang bahad kay sukad, wa pa mahitabo kini sa mao nga siyudad.

Mao na nga ang mga awtoridad di makabasol sa publiko nga motuo gilayon sa mga balita nga nagagikan sa social media posts bisan wa pa maseguro nga di kini tinuod taliwa sa nangaging mga kagubot.

Di usab sila makabasol kon dunay confidential nga mga dokumento kalabot sa intelligence nga makalusot ug mokatap sa social media ug tuohan dayon sa publiko bisan wa pa kini makompirmar ug susihunon pa.

Bisan tuod kon nakapaalarma kini sa publiko, apan mas maayo na lang kini kay magbantay ug mag-igmat na og maayo ang katawhan.

Kalisod baya kon mahisama sa usa ka tawo nga lami ug lawom ang katulog, diha siya nahigmata nga nagdilaab na sa kayo ang iyang pinuy-anan.