Pasundayag pa more!
Imbes meryenda, panihapon na ang giandam ni promo diva Josie Pereyra alang sa mga bisitang artista nga sila si Gerald Anderson ug Arci Munoz kay hapon na ang pagtugpa sa ilang gisakyang ayroplano.
Nibisita ang duha sa Cebu tungod kay isalida na sa Miyerkules ang ilang pelikulang Can We Still Be Friends? Mahitungod kini sa kanhi managuyab nga gustong magpabiling managhigala.
Posible ba na? Mahimo, pwede pod nga dili. Tan-awon na lang nato ang pelikula uy!
○○○ Wa lang damha nakaapil ko sa dula sa tablado nga ‘Laptop’ didto sa M.B. Fernan Press Center sa nilabayng Huwebes ug Biyernes.
Lisod ang akong papel uy! Laliman kag way lihok, way sulti sulod sa pipila ka minuto? Props ang peg. Haha!
Bilib ko sa mga bida nga sila si Jesse Carl Atienza, Cyril Alburo ug Atty. Karen Quinanola Gonzales tininuod gyud ang paghilak. Makahilak pod kag apil.
Maayo sab sila si Armida Gutierrez, Arnel Pahang, Stella Palomo Monteno ug Junrey Alayacyac. Mga pahalipay sa tagsulat ug direktor nga si Msgr. Ting Ancajas ug sa mga sakop sa Il Signore Theater Company 2021. Pasundayag pa more!
○○○ Na-carried away sab diay kuno sa Laptop ang mga taga Newscoop nga sila si Maam Evelyn Sarsale, Leonardo Ubod, Josephine Estenzo, Fernando Arellano ug Editha Booc.
Naa sa 2nd floor sa press center ang ilang opisina. Kuyawg mag-artista pod ni sila.
○○○ Nalingaw ko sa pelikulang Wonder Woman.gi-asoy kon asa siya gikan ug naa pa kini balik lantaw sa nilabayng gubat sa kalibutan.
Makadapit gyud og pagtagad si Gal Gadot isip Wonder Woman ang kanhi Miss Israel man kuno ni siya mao nga gwapa, taas ug seksi kaayo.
Bisan pag gikapoy ko sa biyahe ug nga lawom nang gabii, wa gyud ko nagduka hangtud nahuman ang pelikula.
Nindot sab ang mga pautot sa istorya, basta nalingaw gyud ko. Basin mobalik kog tan-aw kon makahigayon, pero unahon una nakog tan-aw ang The Mummy diin si Tom Cruise ang bida.
Nindot ni tan-awon kon dunay kauban nga hadlokan kay magsigeg syagit makadugang sa ka-alegre.