MGA MAUTE NGA ANIA SA SUGBO NANGAHADLOK

Nibati og kahadlok dinhi sa Sugbo ang mga Maute nga nia magbase sa siyudad.

Nahadlok sila nga maalaan nga sakop sa Maute Group nga nagmugna og kasamok sa Mindanao.

Usa ka tinubdan ning mantalaan nagdala sa apelyido nga Maute miangkon nga di kalikayan nga lain ang pagtan-aw sa ubang tawo ilabi na og masayud nga sila Maute.

Matod ni "Mahsali" nga dugay na sila nanimuyo sa Sugbo sukad pa sa tuig 2007 ug nagnegosyo og tindahan nga nagpadayon hangtud karon.

Nakabaton sila og duha ka mga anak nga nagtungha sa publiko nga tunghaan sa siyudad.

Ang ilang mga anak nga anaa sa grade 8 ug grade 5 sungogon sa ilang mga classmate ug gipatawag pa sa magtutudlo ug gisukit-sukit.

Nagsugod ilang kabalaka atol sa pag-atake sa mga sakop sa Maute didto sa siyudad sa Marawi.

Usa ka driver sa publiko nga sakyanan mihunong sa pagpamasahero tungod sa kahadlok, ilabi na ug madakpan sa traffic violation ug makita ang apilyedo nga Maute.

Laing nagdala sa bansagon nga Maute miundang og trabaho sa pribado nga buhatan tungod gihapon sa kabalaka nga mapagan sa dautang binuhatan sa kapariha nilag apilyedo.

Nanawagan si Mahsali nga di lang unta sila husgahan sa publiko nga kapariha nila og apelyedo ang Maute kay nanimuyo sila nga malinawon sa siyudad sa Sugbo uban sa ilang nga kadugo lumad nga taga Lanao del Sur, diin nagbase ang Maute Group. /