Dengue mosaka karong buwana
Bisan sa pagkunhod sa ihap sa mga kaso sa dengue sa miaging buwan sa Mayo, gipanglantawan karon sa Provincial Health Office (PHO) nga subling mosaka na usab kini sugod karong buwana.
Gani subay niini, subling ilusad sa PHO kauban ang Department of Health ang
Search and Seek program atol sa ASEAN Dengue Day nga ipahigayon sa karong petsa 15 ning buwana.
Kini natukma usab sa pagdeklarar sa Pag-asa nag magsugod na ang ting-uwan.
Gitug-an sa dengue coordinator sa PHO nga si Cyril Pangatungan, 132 nalang ka mga kaso ang natala sa miaging buwan ug mas ubos sa 175 niadtong Abril.
Gikan niadtong Enero, nakita na hinuon ang pagkunhod sa ihap sa mga kaso sa dengue, gikan sa 953 sa maong buwan, 699 sa Peberero ug 383 sa buwan sa Marso.
Duha ang natala nga nakalas tungod sa maong sakit, usa niini gikan sa brgy. Nangka, lungsod sa Boljoon ug sa Gibitngil sa Medellin.
Sa unang lima ka buwan, 19 ang nakalas tungod sa dengue lukop probinsiya.
Pabiling nag-una ang lungsod sa Consolacion sa labing daghan og dengue cases nga moabot ug 218.
Nunot niini, gitug-an ni Pangatungan, nga sa Consolacion nila ilusad ang Search and Seek program, diin tambagan ang kabarangayan pagpangita ug pagguba sa mga posibleng breeding places sa mga lamok.
Ingon man sa pagdangop dayon sa mga health authorities kon makasinati sa mga sintomas sa dengue.
Ikaduha nga dunay labing daghan ug dengue cases mao ang siyudad sa Danao nga dunay 154.
Ikatulo ang dakbayan sa Talisay nga dunay 152, dayon nagsunod ang Argao nga dunay 138 ug 125 sab sa dakbayan sa Toledo.