Balaud nga walay pulos
Daghan kaayong balaud nga gipanday sa atong kongreso ug local government unit (LGU) nga wa gayud mapatuman hangtud karon. Anaa usay gipasar nga lahap ra ang implementing rules and regulations (IRR) nga maoy basihan sa pagpatuman sa maong balaud.
Ang mga kumon nga balaud nga wa mapatuman mo kining anti-littering, speed limit, nagdili sa tricycle sa pag-agi sa national highway ug uban pa. Wa usab mapatuman ang mga ordinansa sama sa curfew, jaywaking, overloading, no smoking ug uban pa.
Angayan usab nga masayran sa tanan nga kining popular kaayong habal-habal wala itugot sa balaud. Dili kini mahatagan og franchise sa LGU ug dili insured ang mga pasahero niini. Gitugotan kining makapamasahero kay sila lamang ang makaserbisyo sa mga tawong nagpuyo sa mga dapit nga dili maabut sa mga PUJ.
Ania pay Anti-Distracted Driving Act diin ang tumong og tuyo sa mga magbabalaud sa pagpanday niini mao ang pagdili sa pagamit sa cellphone ug ubang gadget samtang magmaneho apan ang Department of Transportation (DOTr) lahap kaayo ang ilang IRR diin giapil na nila pagdili ang pagbitay og rosaryuhan ug ubang items sa dashboard.
Daghan nang mga balaud ang wa pa mapatuman ug ayaw na intawon ninyo pun-i og dugang walay pulos ug lisud ipatuman nga mga balaud. Nag-usik lang kana sa salapi nga gisuweldo kaninyo sa katawhan.
Senador Trillanes higala ba sa China?
Kining kanunay og ataki ni Senador Antonio Trillanes kang Presidente Rodrigo Duterte kalabut sa South China Sea nakapahinumdum kanako sa iyang papel panahon sa Aquino administration.
Nabunggo kaniadto nga si Trillanes gisugo diay ni Presidente Noynoy Aquino isip iyang secret special emissary aron makig-estorya sa China kalabut sa atong claim sa South China Sea. Nasayran nga kadaghan siya mobalikbalik didto sa China alang sa maong katuyoan.
Gikuwestiyon kini ni kanhi Senate President Juan Ponce Enrile nga gisaway ni Trillanes. Unsa na man diay ang resulta sa maong biyahi ni Trillanes? Ang gobiyerno ba sa Pilipinas ang nigasto sa maong biyahi? Pila man?
Alang kanako kinahanglan nga mohimo og report si Trillanes ug President Aquino kalabut niini kay daghan ang nagtuo nga wala gayuy nahimong negosasyon tali sa China ug Sen. Trillanes. Makita nato kini sa mga pamahayag sa senador batok sa China niining baruganan karon ni Presidente Duterte kalabut sa South China Sea.
Kongreso misupak kang Duterte
Gibasura sa House sub-committee on correctional reforms ang usa sa mga gipaluyohan nga balaudnon ni Pres. Duterte nga pagminus unta sa edad sa mga bata nga manubag sa krimen nga ilang mahimo gikan sa karon nga 15 anyos ngadto sa nueve anyos.
Ang tanang mga sakop sa maong sub-committee uyon nga ipabilin ang karon nga 15 anyos. Usa ang mi-abstain.