11 KA BALA GIHUROT SA KILLER
GIDUDAHANG KAWATAN SA LAPU-LAPU GITIPI
Gidudahan nga panimawos ang motibo sa pagpatay niadtong 28 anyos nga ulitawo nga giila nga notadong kawatan nga gipusil sa miaging gabii sa Purok Kawayanan, barangay Gun-ob, dakbayan sa Lapu-Lapu.
Giila ni SP02 Allan Pantaleon, homicide section sa city police office, ang biktima nga si Jeffrey Lumaque Cosep, alias Andot, way trabaho, residente sa naasoyng dapit.
Gihulagway nga adunay kasuko ang mamumuno ug gisiguro nga mamatay si Cosep kay gihurot ang bala niini sa armas nga gigamit sa pagpusil.
Base sa imbestigasyon sa kapulisan nga niadtong Martes sa alas 7:15 sa gabii dihang nanihapon si Cosep sud sa iyang gipuy-an, kalit nga nisaka ang wa mailhing lalake ug nipusil sa nagka-on nga biktima.
Samad pinusilan diha sa iyang ulo ug ubang bahin sa lawas ang naangkon ni Cosep nga miresulta sa iyang hinanaling kamatayon.
Ang gunman dali nga misibat ug wa na maabti sa mga miresponde nga sakop sa Police Station 3.
Sigun sa mga kabanay ug silingan ni Cosep nga nagsud-gawas kini sa bilanggoan gumikan sa kasong pagpangawat.
Gihulagway sab nga barumbado gumikan sa iyang pagkalambigit sa pagpangulata ug matod pa daghan og kontra.
Nasayran nga 11 ka mga kabhang sa bala ug usa ka slug sa gituohan nga kalibre .45 nga pistola ang nahipos sa grupo ni Pantaleon gikan sa crime scene.
Matod pa ni Pantaleon sa dihang nahinabi sa Superbalita Cebu nga way witness nga makahulagway sa mamumuno.
Gawas nga ngitngit, lapukon ang maong dapit gumikan sa sagunson nga uwan hinungdan nga way naglaroy-laroy sa maong dapit niadtong higayona. /