Ginansya batok kalambuan

Kaniadto pa nga nagdagan ang labing uwahing Pinoy Big Brother edition nipahayag na ko nga di ganahan ni Maymay Entrata labina anang pagsiga-siga sa iyang mata agig reaction sa sulti ni Big Brother sulod sa confession room.

Nisamot akong pagka way gusto sa housemate dihang kapila gyud niya gibalikbalik ang "Oh my God!" dihang unang nisulod sa PBB House si Enrique Gil.

Sa pagdaug ni Maymay, ni- post ko sa Facebook nga "Kay siya man god kaha ang gibotahan sa madlang pipol, eh… di, wow!" Ni- react ang usa ka higala nga "bitter" kuno ko.

Nitubag ko nga "Di man. Wa man koy bet. Di lang gyud ko ganahan niya." Ana!

Nasulat ni nako dinhi agig reaction sa paglusot sa mga indie movies sa nilabayng Metro Manila Film Festival. Tungod kay ginindotan ko sa mga nilusot, nanghinaut ko nga kadtong mga prodyuser nga bitter sama ni Mother Lily tungod kay na- backstage ang iyang Mano Po 7 (pero siya man diay gihapon ang prodyuser sa Seklusyon), maghimog pelikula nga parehas sa mga official entries.

Karon kay gibungkag na man ang MMFF Committee tungod kay naalkanse lagi ang niaging filmfest. Goodbye kausaban.

Sa ato pa mas gipalabi gyud sa Metro Manila Dev’t. Authority nga nagpadagan sa MMFF ang kita ug ganansya kay sa paglambo sa kalidad sa mga pelikulang moapil sa filmfest.

Nagtuo kong moabot og Game 7 ang championship series sa San Miguel Beermen ug Brgy. Ginebra Gin Kings. Unsa ba nga nagdaug na man sa Game 5 pa lang.

Hinoon, wa kaayo ko kafeel sa excitement kay ang Star Hotshots man gyud ang akong gipaluyohan. Ana!

Wala na ko kasunod sa ‘Tapatan sa Tawag ng Tanghalan’ kay medyo daghan tag gikalingawan karong mga adlawa. Syempre nagpaluyo ko kang Mariel Montellano kay Sugbuanon baya ni.

Kon wa ko masayop, usa si Mariel sa mga produkto sa Halad sa Kabataan nga proyekto sa Kapitolyo ug nga akong gipangulohan sa wa pa ta mohukom nga mosayo og retiro.

Mao nga kon unsa may dagan sa bangga manghinaut ko nga paluyohan ninyo mga suking magbabasa si Mariel.

‘Northern Lights’ diay ang titulo sa pelikula ni Piolo Pascual nga ipasundayag sa tumoy karong bulan sa Marso.

Wa pa ko kabasa og unsay istorya niini nga mora mag Hollywood movie ang titulo. Wa pa sab ko kahibalo kinsay mga kauban ni Piolo dinhi.

Hinuon niingon na si promo diva Josie Pereyra nga mobisita gyud si Piolo sa Cebu sa dayon nang pasundayag sa iyang pelikula. Atong atangan.