Morag Maayo
Binasi sa Genesis 2:7-9; 3:1-7; Salmo 51; Taga Roma 5:12-19; ug Mateo 4:1-11
Kon dunot pa to nga bunga ang gihatag sa bitin kang Eva, iya tingali tong balibaran. Apan nindot man tan-awon ug makalaway kay lami kan-on. Mao nga gikaon niya kini ug nangagda pa gyod siya sa iyang bana nga si Adan nga mikaon usab.
Daghang mga kadaotan ang magsugod sa morag maayo nga butang. Kining manghilabot og dili ila, sama sa usa ka tawo nga mosulod sa tindahan ug mokuha nga way bayadbayad, nadani sa kanindot sa butang. Ang nakita nila mao lamang ang kanindot sa butang ug hikalimtan nila ang hago sa uban.
Sama kini sa pipila ka mga sakop sa usa ka “communityrehab program” nga gitawag og “Labang” (“Lahat Bangon”) sa Barangay Subangdako Mandaue. Aduna silay proyekto sa pagtanom og mga utanon sa mga waygamit nga lote. Gibutangan nilag paril ang utlanan sa lote. Dagko na ang mga utanon. Usa ka adlaw niana nangawagtang ang anihunon. Adunay mikawat niini, dawat lag limpiyo sa hinagoan sa uban.
Diha sa ebanghelyo sa unang Domingo sa Kuwaresma, adunay tulo ka tentasyon si Jesus: ang bato nga himuon og pan, ang pag-ambak gikan sa taaas nga lugar nga pagasaw-on sa mga anghel, ug ang pagsimba kang Satanas aron madawat ang gahom ug bahandi. Matag usa niini adunay gitubag nga panginahanglan o gipangandoy sa tawo.
Ang una mao ang panginahanglan nato sa butang nga maayo. Maayo baya ang pana ug tambal sa kagutom. Ang ikaduha mao ang atong pangandoy sa kinabuhing dayon. Dili baya ta gustong mamatay. Ang ikatulo mao ang tawhanong himaya. Buot baya sad nato nga ilhon ta ug hatagag importansya.
Balikan nato ang unang tentasyon. Kon gihimo pang pan ang bato, matambalan ni Jesus ang iyang kagutom apan “short cut” ni sa plano sa Dios sa pagpangluwas ug wala panumbalinga ang tanlag. Sa nahisgotan na, mao kini ang sinugdanan sa daghan kaayong kadaotan sa kalibotan karon, sugod sa pamilya.
Diha sa libro sa Genesis makita nato ang usa ka mabulokon kaayong panghitabo sa tentasyon ni Adan ug ni Eva. Dili diretso ang pagtental sa yawa. Wa dayon siya moingong nga dili sundon ang Ginoo. Hinayhinay kini nga pagdani. Wa madugay nakita sa babaye nga ang bunga “maayong kan-on, nindot tanawon, ug makaibog sa pagbaton og kinaadman.” Ug mikaon siya.
Apan gipahinumdoman usab kita ni San Pablo sa iyang suwat ngadto sa mga taga Roma nga kon naapektohan ang plano sa Dios alang sa kaayohan sa tawo tungod sa sala sa us aka tawo nga mao si Adan, nga mitilaw sad sa ginadiling prutas, usa usab ka tawo nga nakapahiuli kanato sa Dios. Gani makapila gamita ni San Pablo ang mga pulong “labaw pa gayod” aron paglarawan sa bunga sa sakripisyo ni Cristo.
Ang atong kaluwasan anaa lamang kang Cristo nga maoy nibuntog sa kangitngit.
Daghang mga hagit ang giatubang nato ug sa atong nasod sa kasamtangang panahon. Aron sumpuon ang kriminalidad, may mga buot ibabalik ang “capital punishment.” Apan kini dili mosumpo sa kriminalidad kon basihan nato ang daghang datos.