4 na patay sa rabies sa Rehiyon 7

Nisaka na ngadto sa upat ka mga tawo ang natalang patay karong tuiga lukop Central Visayas Sa kaso sa rabies.

Kini maoy gitug-an ni Dr. Joanri Riveral, medical officer sa DOH 7.

Matod niya nga niadtong 2016, miabot sa 59,773 ka mga tawo ang napaakan og iro diin labing daghan ang lalawigan sa Sugbo nga aduna’y 11,536 ka mga kaso nga natala.

Walo usab ang natala nila nga patay base sa hospital records, apan 14 tanan base sa ilang monitoring. Awhag hinuon sa opisyal sa mga tawo nga mapaakan og iro nga daling magpa- inject og Rabies Immune Globulin (IG) ug rabies vaccine tungod kay kon mosaka na ang rabies sa utok sa tawo, dili na kini matambalan.

Ang IG i- inject duol sa samad diin napaakan ang tawo aron di dayon mosaka ang rabies sa utok.

Tambag usab ni Riveral sa publiko, nga moduaw kini sa gobyerno nga mga local

health centers aron makapahimulos tungod kay libre kini. Anaa sa P1,500 ang rabies

vaccine samtang P3,000 ngadto sa P5,000 ang IG.

Dugang niya nga tungod kay mahal ang maong mga tambal kinahanglan nga accredited sa World Health Organization ang mga rabies vaccine nga ilang paliton sa mga botika.

Nasayran nga gisaulog sa ahensiya ang Rabies Awareness Month.

Gipasabot usab ni Dr. Alice Utlang, City Veterinarian sa siyudad sa Sugbo, nga motaas ang kaso sa rabies panahon sa summer gumikan kay panahon kini sa bakasyon sa mga tinun-an.

Giklaro niya nga way kalambigitan ang init nga panahon, sa insidente sa pagdaghan sa mga tawo nga mapaakan og iro.

Posibleng mga rason kon nganong mamaak ang iro, mao kon matumban kini, kon mabalda ang pagkaon ug samukon kini sa pagtulog niini.

Sagad sa mapaakan mga lalake kay mao ang kiat.

Tambag ni Utlang sa mga nanag-iya og iro nga ila kini ampingan ug ilakaw-lakaw aron maka- socialize usab ug di maihas nga maoy rason nga mamaak kini.

Kalapasan usab sa Republic Act 8485 kun ang Animal Welfare Act, ang pagpabaya sa usa ka nanag-iya og iro sa iyang binuhi.

Gitug-an ni Utlang nga kada buwan, moabot sa 50 ka mga libud-suroy nga iro ang ilang madakpan ug i- impound sa ilang pasilidad, diin bukas kini alang sa adoption.