Mga tinun-an nga apektado sa sunog mingtipon og mga klase
MOSAWO lang una kadtong mga tinun-an sa ilang klase sa classroom nga gamay ra ang estudyante samtang ang uban magklase sa gym ug faculty rooms sa Maribago Elementary ug High School human na naugdaw sa sunog ang pipila ka classrooms niadtong Martes sa buntag.
Si Division School Superintendent Marilyn Andales nipahibawo nga sud sa duha ka adlaw nga wa una mag-klase kadtong mga tinun-an sa Maribago, kinsang classrooms nasunog.
“Mo- resume na sila (tinun-an) og klase today,” pamahayag ni Andales sa dihang nahinabi sa Superbalita Cebu.
Ang Siyudad nipadala gilayon og personnel sa city engineering, clean and green ingon man mga drug surrenderee nga anaa sa Material Recovery Facility (MRF) alang sa clearing operation sa tunghaan.
Samtang si Assistant Division Sch. Supt. Marcia Digno nipahibawo nga moabot sa 15 ka mga klase sa naasoyng tunghaan ang apektado sa pagkasunog sa 10 nila ka mga classroom, sanglit sa matag lawak saringan shifting ang klase sa mga tinun-an, gawas sa high school.
Nasayran nga usa ka classroom sa Kindergarten, lima sa elementary ug upat sa high school ang gilamoy sa kayo niadtong Martes sa 6:43 sa buntag .
Ang nasunog nga tunghaan sa elementary gikinahanglan nga i- demolish kay ginama sa light materials samtang ang duha ka andana nga building sa high school department gikinahanglan nga palig-unon sa di pa makabalik ang mga tinun-an.
Base sa imbestigayon sa Bureau of Fire and Protection nga electrical misuse through loose connection maoy hinungdan nga mi-ulbo ang kayo sa tunghaan niadtong Martes.