`Brace’ gibawi sa uyab

(Napatik sa Superbalita CDO, Pebrero 5, 2017)

GIPUGOS pagpanganga sa usa ka lalaki ang iyang kanhi uyab aron makuha ang brace sa ngipon aron wa nay makagusto hinungdan sa pagkasikop sa lalaki niadtong niaging adlaw sa dalan Corrales ning siyudad sa Cagayan de Oro.

Detinado sa mini detention cell sa Police Station 3 (PS3) sa Agora si Renato (bansagon gitago), 52, taga Barangay Cugman ning siyudad human gipadakop sa 21 anyos nga babaye nga giingong iyang kanhi uyab.

Sa impormasiyon nga nahipos gikabutyag nga nasikop ang suspek human miresponde ang awtoridad kalabot na sa taho sa katawhan.

Nasayran nga nag-ipon na ang duha kaniadto apan sige kini og kulatahon sa suspek ug wa na makaagwanta hinungdan nga iya kining gibulagan.

Gidugang pa nga karong panahona aduna nay laing hinigugma ang batan-on nga babaye hinungdan sa grabe nga selos ni Renato.

Giingong giatangan niini ang batan-on sa dapit ug kalit nga gibunlot ug gipanganga dalang kuha sa brace sa babaye ug ang cellular phone niini.

Giangkon usab sa suspek nga dako pa gihapon ang gugma niini ngadto na sa batan-on ug tuyo niini nga kuhaon ang pustiso aron nga wa nay maibog pa sa babaye.

Samtang sa bahin sa dinakpan giingong dako kaayo ang pagmahay niini gumikan kay iya nga gitinarong ang babaye ug iyang gibuhat ang tanan aron lamang nga mapakita ang dako usab kaayo niini nga gugma.

Ug gani kun unsa ang pangayuon niini iya kining gihatag tanan sama sa sapatos, sinina, braces, upat ka mga cellphone ug uban pa.

Gani sa dihang nasuta niini nga duna kini laing hinigugma kinsa anak ra usab sa ilang gipuy-an nga panimalay hinungdan nga grabe na ang kasuko niini ug tungod sa brace hinungdan nga kini nagbinuang mao nga iyang gitunob-tunoban kini. “Iya man ko’ng gilakaw lakawan bah mao to, kanang imong braces mao nay hinungdan nga nagloko ka so mi- shot pa gyud akong kamot sa iyang baba, mihilak man siya, so natangtang,” pahayag niini sa interbyu sa radyo. Sa pagsuwat niini nga balita ang kaso ang giduso na sa Women and Children Protection Desk (WCPD) alang sa tukmang disposasiyon.