2 ka trak nga basura gikan sa Mahiga
MOKABAT ngadto sa duha ka mga trak nga basura ang nakuha sa Mandaue City Engineering Office (CEO) atol sa ilang dredging operation sa sapa sa may Innodata, Barangay Subangdaku kagahapon sa udto.
Matod sa CEO nga gibanabana nga moabot pa ngadto sa upat ka trak sa basura ang pabiling nakabara sa Mahiga Creek nga maoy hinungdan sa pagkabara sa sapa nga maoy hinungdan sa pagtaas sa tubig panahon sa kusog nga uwan.
Human sa pagbaha nga nasinati sa dakbayan sukad niadtong Biyernes, gimando dayon ni Mayor Luigi Quisumbing ang pagpanglimpyo sa mga drainage system ug agianan sa tubig sa dakbayan.
Nasuta ning mantalaan nga human sa crisis meeting committee pinaguluhan sa mayor niadtong Sabado, mopahigayon na unta og emergency dredging ang CEO apan na-postpone kini human mibalik ang kusog nga uwan.
Matod ni City Engineer Andres Suson nga ila unyang padayunon ang ilang dredging operation sa Gentle Breeze Subdivision, utlanan sa Subangdaku ug Banilad lakip sa Rolling Hills sa A.S. Fortuna.
“Mao ni ang area nga critical nga kailangan gyud i- improve kay grabe ang basura kon magbaha,” matod Suson sa mga tigbalita.
Dugang niya nga ilang nabantayan atol sa ilang operasyon kagahapon nga usa ka sako sa basura ang gilabay sa Mahiga Creek.
Saysay niya nga gitahasan siya ni Quisumbing nga istriktuhon ang pagpatuman unya sa saktong paglabay sa basura.
“Hangyo nato sa katawhan, kinahanglan nga naa tay disiplina sa paglabay sa basura kay mao ni hinungdan sa baha,” padayag ni Suson.
Kahinumduman nga human sa kusog nga pagbaha, gimando dayon ni Quisumbing ang istriktong implementasyon sa ordinansa sa plastic ban sa dakbayan ug nibahad nga ipadakop ug pasakaan og kaso ang masakpang magpasagad og labay sa ilang basura.
“I am asking our City Legal Office and CENRO (City Environment and Natural Resources Office) to conduct training to our Barangay Tanods to effect citizen’s arrests to those that are caught littering in Mandaue especially in our waterways. The City will be pursuing the cases,” pahibawo ni Quisumbing sa iyang Facebook post.
Buot ni Quisumbing nga ibalik sa Department of General Services ang clean and green personnel aron mas epektibo ang deployment ug monitoring sa mga empleyado.
Niadtong Biyernes sa gabii, sobra sa 30 ka pamilya ang gi- rescue ug gipabakwit sa City Disaster Risk Reduction and Management (CDRRMO) sa may Mahiga Creek, Subangdaku nunot sa pagtaas sa tubig.