Napilde ko sa gubat
HUMANA ang bugnong lugaynon. Kasagaran nagpaalim sa mga garas sa politika. Tugoti nga akong isaysay niining lindog ang kaugalingon kong kasinatian sa unang pagsulod ko sa politikanhong kalibotan. Napilde ko sa akong pagdagan pagka-bokal sa unang distrito sa lalawigan sa Sugbo nga gilangkoban sa mga lungsod sa Sibonga, San Fernando, Minglanilla, ug mga siyudad sa Carcar, Naga ug Talisay. Naparot ko sa akong mga kaatbang apan milampos ko sa akong pagsulay.
Pagsugod sa kampanya gisuhid ko ang kabukiran sa distrito. Nakighimamat sa kinabag-an. Sila mao untay akong gitagan-an sa akong gugma sa panerbisyo agig pagpalapad sa daghan nakong natabangan sa akong mga programa sa dyRC, 4:00 am – 6:00 am ug 9:00 pm – 11pm, Lunes ngadto sa Biyernes. Salamat sa katawhan nga mihugop sa akong presensya sa kabukiran. Makasabot ko sa pinitik sa pulso sa mga tawo, dili maglagyo ang among pagbati kay ako usab natawo man sa sabakan sa bukid sa barangay Tubod, Sibonga. Makasabot sa matuod nilang panginahanglan. Ang dahunog sa ilang hukom maoy akong gilaoman.
Inig lugsong nako sa kapatagan ug kinaposoran sa lungsod ug siyudad nga sakop sa unang distrito milukso ang akong kalipay nga nakalusot sa on-line survey nga gipasiugdahan sa Sun.Star Publishing. Dihay higayon nga milumpayat ang akong kadasig daw kabayong ihalas. Diha sa akong kasing-kasing, balatian ug hunahuna nga mabutangan og katumanan ang akong mga gidamgo ug gipangandoy nga makaalagad sa katawhan sa minahal tang lalawigan.
Apan pag-abot sa adlaw sa politika manglupad diay ang dagkong kantidad nga nakatuis sa huyang nga baruganan. Daghang nabutaan sa salapi nga nadawat kay mao namay gisunod ang konsensya sa kwarta. Apan wala akoy pagmahay kanila. Busa kadtong haguka ug panglantaw mibaligya sa ilang balaanong katungod sa pagpili. Hinikalimtan ang kandidato nga haom sa gidaganang posisyon. Maayo untag gikaon ang paon ug giluwa ang taga. Apan gamhanan ang kwarta. Sa akong kabahin walay usa ka balhibo nga natagak gikan sa akong bulsa kay wala sa akong kinaiya ang pagpamayad, wala pod hinoon koy ikahatag sanglit kabos ko nga kandidato. Leksyon nga akong nahipos nga dili magsilbi nga magpapili ka nga walay kwarta. “I lost the battle but not the war”. Ang akong kasinatian dili kabayran og bulawan.