Line-up ni Peña kompleto na

KOMPLETO na ang line-up ni Mayor Elanito Peña sa lungsod sa Minglanilla sa sunod tuig nga piniliay ubos sa Alayon Party.

Si Peña, kinsa subling magpapili sa pagkamayor, mipahibawo nga pabiling lig-on ug wa mabungkag ang iyang grupo.

Kini sukwahi sa mga taho nga nabungkag ang grupo sa mayor samtang aduna pay pipila ka mga barangay kapitan ang mibiya na kaniya.

Matod sa mayor nga way kamatuoran ang naasoyng taho hinuon nagtuo siya nga mugna lang kini sa iyang mga kaatbang.

Kini tungod kay sa 19 ka barangay sa Minglanilla, 13 ka kapitan ang anaa kaniya samtang unom lang ang anaa sa pikas.

Samtang lakip sa gibutyag ni Peña nga ang iyang bise mayor nga si Jojo Selma mao gihapon ang iyang running mate ug di tinuod nga moatbang kini kaniya.

Sa mga konsehal, upat ka incumbent nga mga konsehal ang subling magpapili nga anaa sa ilang grupo nga mao silang Jong Adlawan, Roy Nacario, Jerry Canares ug Jimmy Gumeran.

Ang bag-o nilang mga kauban mao sila si Alex Abadinas, retired 2 star general; Frus Laput, principal sa University of Visayas; Dodong Guituavan, barangay kapitan sa Tunghaan ug ang barangay kapitan sa Tungkop, Edwin Quiapo.

Posibli nga tulo ang magpapili sa pagka-mayor sa lungsod diin mopapili pagbalik si Marlo Cañada ug ang bag-o mao si Alex Cañares nga usa ka magpapatigayon.