Revised schedules sa Cesafi gireklamo; way duwa karon

Organizers mikanselar sa duwa karon; board mag emergency meeting

TUNGOD sa reklamo sa kalit nga pag-usab sa schedules, way duwa nga ipahigayon karong adlawa sa nagpadayon nga semifinals sa Cebu Schools Athletic Foundation, Inc. (Cesafi) basketball tournament diha sa Cebu Coliseum.

Kini maoy nakab-ot nga kasabutan sa mga officials human ang pipila ka mga coaches mireklamo nga wala sila pahibaw-a sa kalit nga pag-usab sa ilang mga schedules.

“Duna na tay original nga schedules nga maoy gitamdan. Unya kalit nilang usbon nga wala gani mi kahibawo. Ako karon (kagahapon) nakong hapon nakahibawo nga sayo diay ang duwa ugma (karon). Wa mi nila pahibaw-a nga diha man unta mi human sa among duwa kagahapon,” matod ni coach Jun Noel sa

University of San Jose Recoletos Jaguars.

“Sa unang schedules gud, alas singko among duwa batok sa San Carlos, Karon ila mang gibutang og sayo nga wa mi pahibaw-a. Mora na tag interbarangay na hinuon ani. Kalit-kalit atong schedule,” dugang ni Noel sa dihang nahinabi kagahapon sa Sun.Star

Superbalita.

Sa revised schedules ni commissioner Felix Tiukinhoy Jr., ang University of San Carlos Baby Warriors makigtinaktakay sa UV Baby Lancers sa alas dos sa hapon alang sa third place sa high school division.

Sa alas 3:30 sa hapon, ang USJ-R Jaguars ni coach Noel ug ang USC Warriors ni coach Britt Reroma mao usab ang magsangka samtang sa alas singko sa hapon, ang sangka na usab ang UV Lancers ang SWU Cobras alang sa katapusang adlaw sa semifinals round.

Ang Warriors hayaghayag na’g poruhan nga makasulod sa finals gumikan sa ilang 2-0 nga rekord, ang Jaguars ug Green Lancers parehong naggunit og 1-1 nga baraha samtang ang Cobras wa pa’y daog sulod sa duha ka mga duwa.

Apan ning puntoha, wala pa’y nakaseguro nga makasulod sa finals ug wala pa sa’y natagak ug daghan pang senaryo ang angayang bantayan.

Kon parehong modaog ang Warriors ug Cobras, makuha sa Warriors ang unang puwesto sa finals samtang mahitabo ang triple-tie sa 1-2 nga rekord tali sa Cobras, Green Lancers, ug Warriors.

Ning sitwasyuna, gamiton ang multiple tie-breaker aron pagdeterminar kon kinsa ang ikaharong sa Warriors alang sa finals.

Kon ang Jaguars ug Green Lancers ang modaog, matagak ang Cobras ug mahitabo sab ang triple-tie sa 2-1 nga rekord tali sa Warriors, Jaguars ug Green Lancers.

Ning sitwasyuna, gamiton sab ang multiple tie-breaker aron pagdeterminar sa duha ka finalists.

Mao kini ang mga sitwasyon nga makahatag og komplikasyon samtang ang ubang mga senaryo dili na lisod sabton.

Sa laing bahin, magsangka sa premirong duwa USC Baby Warriors ug UV Baby Green Lancers alang sa usa ka knockout game sa inilugay sa ikatulong dapit sa high school division.