Lalake miambak sa Cansaga Bridge napalgan nga patay
USA ka lalake wailhing lalake nga gituohang nilayat sa taytayan sa Cansaga niadtong Miyerkules sa buntag ang nakit-ang patay ug naglutawlutaw na sa kadagatan sa may Brgy. Paknaan, dakbayan sa Mandaue niadtong Huwebes sa hapon.
Atol ning pagkutlo ning balitaa, wa pa mailhi sa mga awtoridad ang pagkatawo sa maong lalake nga nakit-an pasado alas 3 sa hapon.
Matod ni PO1 Matt Roco sa Basak Police Station nga human nila madawat ang taho kabahin sa lalake, daling niresponde dayon ang Coast Guard sa maong lugar ug gidala ang lawas sa biktima sa usa ka shipyard sa Brgy. Tayud, Lungsod sa Consolacion.
Nasuta ning mantalaan nga way nakaila sa mga lumolupyo sa maong lalake sa lugar.
Wa usay nakit-ang identidication card (ID) o dokumento ang kapulisan gikan sa biktima nga makahimo sa pag-ila bisan sa ngalan lang sa maong lalake.
Base sa paghulagway ni Roco, ang lalake nagsul-ob og orange stripe nga pang-itaas ug jogging pants.
Wa usab kini gisul-ob nga sapatos o tsinelas ang lalake kinsa gibanabana nga nag-edad og 20 ngadto na sa 30.
Dauton ang pamarug sa maong lalaki, taas og buhok ug dunay gitas- ong 5’7 ka mga tiil, sigun ni Roco.
Dugang niya nga gisuta nila karon kon unsa ang namatyan sa maong lalake ug kon duna bay foul play sa kamatyon niini tungod kay may samad kini sa nawng.
Ang lawas sa biktima kasamtangang anaa sa Rolling Hills sa dakbayan sa Mandaue ug gikatakdang ipa- autopsy sa kapulisan.