Nganong mas maayong moinom og init human sa imong kaon

ANG pag-inom og tubig sa di ka pa mokaon makatabang sa pagpaubos sa imong timbang. Kay puno na ang imong tiyan sa tubig, gamay ka na lang og kan-on.

Ang pag-inom og tubig human mokaon og tambok ug taas og calorie makamugna og problema.

Di tanang mga doctor uyon sa epekto sa tubig, ug kon mangutana ka sa imong doctor, hayan mosulti siya nga minusan ang pagkaon og tambok.

Tambok nga pagkaon

Sayon ra nimong mahibaw-an kon ang pagkaon dunay fats pinaagi sa pagbasa sa label. Ang pagkaon nga daghan og fats, kasagaran naandang gigamit, sama sa fat milk, butter, cheese, bacon, sausages ug uban pang lamian nga pagkaon.

Kining matanga sa mga pagkaon taas og level sa saturated fats, nga gidugang sa diet nga tambok, mas mopataas sa level sa bad cholesterol.

Ang fats mopataas usab sa triglycerides, nga hayan mo- mugna og lamoglamog sa kaugatan, nga maoy hinungdan sa paggamay sa agianan sa dugo.

Kining tanan mosangko sa high blood pressure ug sakit sa kasingkasing.

Paghilis sa tambok

Ang tambok hilison sa enzymes nga gigama sa apdo ug atay. Ang atay mogama og bile, nga giubanan og tambok. Sa paghilis sa mantikaong pagkaon ug sa pagdagan niini sa tungol ug tinai, mopagawas ang atay og bile aron hilison ang tambok.

Ang lawas mopatuhop sa atong gikinahanglang tambok, ang sobra ilabay gikan sa lawas.

Gamit sa tubig

Ang pag-inom og tubig init pinaagi sa tea mopalambo sa paghilis sa fats. Pinaagi sa kainit, magpabilin nga liquid ang fats nga di makagahi. Motabang ang init nga tubig sa pagpagawas sa tambok gikan sa atong digestive system ug molabay sa wa kinahanglanang tambok.

Ang tubig nga bugnaw mopagahi sa tambok, nga mopahinay sa paghilis niini. Ang dakong problema niini mao nga ang lawas nagkinahanglan og igong panahon sa pagsuyop sa fats kon ikaw overweight, taas og cholesterol ug triglycerides.

Solusyon

Inom og tubig sa di ka pa mokaon aron mominos ang pagkaon og tambok ug uban pa. Ang duha ka basong tubig makapapuno sa tiyan, ug motabang kini nga di ka kaayo gutumon.

Inom og init nga ilimnon nga mopadali sa paghilis sa tambok ug kalimti ang bugnaw nga ilimnon, labina kon mantikaon ug taas og calorie ang imong pagkaon.