BLGF gikuhaag katungod?

KON unsa man gani ang tinuoray nga rason ning kalit nga pagpabalhin ni Talisay City Treasurer Emma Macuto ngadto sa laing departamento, bugtong si Mayor Johnny V. delos Reyes aka JVR lang ang nasayod niini.

Sa niaging adlaw, si JVR miluwat og kamanduan nga nagbalhin kang Macuto ngadto sa Tabunok Public Market sugod niadtong Septiyembre 30.

Gibasehan kunohay sa mando ni JVR mao ang rekomendasyon gikan sa Commission on Audit (COA) nga mohimo og imbestigasyon ug pag-audit sa buhatan ni Macuto.

Matod ni Macuto nga sulod sa 30 ka tuig kini maoy unang higayon nga nakasinati siya sa ingon.

Pero yuna ra. Dili ba ubos man sa hurisdiksyon sa Bureau of Local Government Finance (BLGF) 7 ang buhatan ni Macuto?

Tinuod nga ubos sa kamanduan sa chief executive sa local government unit ang buhatan sa tresurera, apan gahum sa pagtudlo ug pag- assign og mga personnel iya kana sa BLGF.

Sa dakbayan sa Sugbo, ang buhatan sa treasurera maoy perming masentro sa kontrobersiya gumikan ning panagbangi sa pulitika ni Mayor Michael Rama ug sa kanhi mayor nga si Tomas Osmeña.

Apan ang tanan pulos nila gipaagi sa BLGF. Pananglitan, niadtong 2011, tinguha ni Osmeña nga mabalhin si Cebu City Treasurer Ofelia Oliva pinaagi sa paghangyo sa BLGF. Pero gisupak kini ni Rama pinaagi sa paghangyo usab sa BLG.

Ang punto nga gusto natong ipaabot mao nga si Osmeña ug Rama pulos mirespeto ug misunod sa katungod sa BLGF tungod kay mao man kini ang nalatid sa balaod.

Nganong si JVR di man makahimo niini? Tungod ba kaha sa iyang kakuwang sa kahibawo sa balaod o dunay nakatambag sa mayor nga labaw pang wa pud diay kahibawo.