Ordinansa sa curfew

Dear Atty. Joan,

Ang akong anak nga onse anyos, nadakpan sa mga tanod sa among barangay tungod kuno sa pag- violate sa ordinansa sa munisipyo kabahin sa curfew. Gisugo man god nako siya sa pagpalit og tambal kay nagbutod ang tiyan sa akong kamanghoran, ug alas 11 na sa gabii atong panahona. Gidala nila ang bata sa barangay hall ug gipatawag mi sa akong pares bisan hapit na motunga sa kagabhion. Legal ba ang maong ordinansa, ang pagdakop sa akong anak, ug ang pagpatawag kanamo sa akong bana niadtong gabhiona. Daghang salamat.

Jean

Dear Jean,

Wala mi kopya sa ordinansa nga imong gipasabot ug wala usab nimo hisgoti sa imong sulat unsang barangaya ang imong gipuy-an aron makapangayo kami og kopya sa maong ordinansa. Busa, dili mi makasulti kon legal ba o dili ang maong ordinansa sa iyang kinatibuk-an, o may mga porsyon niini nga nakalapas sa atong mga nasodnong balaod, labi na ang R.A. 9344 kon Juvenile Justice Welfare Code.

Hinuon, ania ang pipila ka mahinunongdanong mga punto. Una, wala gidili sa nasodnong balaod ang pag-imposar og curfew alang atong kabataan. Tinuod nga ang Seksiyon 57 sa R.A. 9344 nagdili sa mga status offenses, apan ang Seksiyon 57-A nag-ila sa pagpahamtang og curfew sa kabataan isip usa sa mga pwedeng himoon sa usa ka local government unit (LGU).

Ikaduha, ang bata nga nakalapas sa curfew dili angay presohan. Ang mahimo sa mga barangay tanod mao ang pagdala sa bata ngadto sa iyang mga ginikanan, o sa barangay hall. Ang gihimo sa mga barangay tanod sa imong sulat nahitukma sa balaod.

Ang pagpatawag kaninyo sa imong bana ngadto sa barangay hall bisan kon halawom na ang kagabhion mahimo. Apan sa among tanaw, angay unta nga may eksepsiyon ang ilang ordinansa sa curfew kabahin sa mga lehitimong katuyoan, sama sa pagpalit og tambal bisan lawom na ang kagabhion.

Hinaot nakatabang kini kanimo.

Atty. Joan