Hakog nga suluguon
DAGHAN ang nag-alagad isip suluguon. Ang kasagaran nga nganlan ug suluguon mao ang katabang sa panimalay, musugot sa unsay isugo sa iyang agalon sa mga mutoman sa sugo sa iyang labaw aron pagpatunhay sa kahusay ug kalinaw.
Ang nahipus ning usa ka paghinugilon mao ang usa ka suluguon sa Simbahan. Tawgun usab ug suluguon sa kahitas-an. Gitugot kaniya ang pagsangyaw sa maayong balita diha sa ebanghelyo aron pagpaambit sa katawha. Makahimo siya pagsaulog sa Santos nga Misa sulod sa Simbahan o Kapilya. Maayo siyang muwali sa katawhan mahitungod sa balaang mensahe sa Dios nga gikutlo gikan sa Bibliya ug ubang kasulatan.
Didto sa habig sa kabagatan sa Sugbo dunay usa ka kapilya nga natukod niadtong naghinapos na ang siglo sa 1,800. Ang maong kapilya misugod sa dakung paglambo tungod sa Santos nga Patron niini nga gituhuan sa mga magtutuo nga milagroso ug naghatag kanilag mga grasya. Gani, sa halos tibuok hapupud-an ang iyang pagkamalambuon. Ug niadtong naglakaw ang sayung katuigan sa 1,900 mibarug ang usa ka maanindot kaayo nga kapilya nga hangtud ni’ng panahona gihugupan pagtahud sa mga deboto gikan sa nagkalain-laing mga dapit aron pag-ampo, pagdagkut, ug paghaluk sa imahen sa maong Patron sa kapilya.
Ang natukoy nga suluguon sa Simbahan nabalhin sumala sa sugo sa iyang labaw didto sa lungsod diin nahisakop ang kapilya.
Gumikan sa paglambo sa maong kapilya matag adlawng Dominggo ug ubang adlaw’ng iglilihi ginasaulog ang Santos nga Misa sa kapilya sulid pa sa nanglabay’ng katuigan.
Ug kay ang maong suluguon sa Simbahan mao man ang nagdumala sa Simbahan sa lungsod, siya usab ang tigpahigayun sa Misa sa maong kapilya. Ug kay dako lagi ang donation gikan sa manimbahay ug mga magtutuo dako usab ang hatag kaniya sa kapilya sa matag saulog niya sa Santos nga Misa.
Sa nagkadugay, giangkon na sa maong suluguon ang donasyon sa pamisa alang sa mga kalag. Kaha wala pa siya matagbaw, buot niyang iyahun ang mga donasyon sa pasalamat. Niadtong tungura mibalibad ang tinugyanan sa Kapilya kay unsa pa man ang i-mintinar sa galastuhon kon iyahun nalag ang tanan.
Kining maong paghinugilon mahitungod sa usa ka suluguon sa Simbahan, nagbitbit ug panultihon... “nga ang tawo kun sa iyang paghimugso dinhi sa kalibutan anaa na kaniya ang kinaiya sa pagkahakug, bisan ug makab-ut pa niya ang taas nga kinaadman, mutumaw gyud ang pagkahakug...” DATTA