PAPA KRITIKAL, BATA LUWAS
Gibanhigan dayong gawas sa balay sa Happy Valley, siyudad sa Sugbo
NEGOSYANTE kritikal ug napaan ang iyang anak 7-anyos nga anak napagan sa pagpamanhig sa tulo ka mga lalaki nga nagsakay og motorsiklo sa Happy Valley, Barangay Guadalupe, dakbayan sa Sugbo kagahapon sa alas 7:16 sa buntag.
Si Jonathan Emmanuel Go, 38, maghatod unta sa tunghaan sa iyang anak nga si Joan Emmanuel, 7, dihang gibanhigan sa dayong gawas sa gate sa ilang balay sakay sa awto.
Nakaangkon og daghang samad pinusilan ang amahan ug kritikal sulod sa usa ka tambalanan atol ning pagsuwat ug ang bata naigo sa tuong bukton apan luwas na ang kahimtang niini.
Si SPO1 Ruth Violango, imbestigador sa Homicide Section sa Cebu City Police Office (CCPO), niingon nga duha ka gunmen ang nipauwan og mga bala sa biktima samtang, laing usa ang nagpaabot nag- sakay sa motorsiklo nga gisakyan nila sa pagsibat.
Si Go maoy nagmaniho sa iyang Toyota Vios sakay ang iyang anak diha sa likod nga lingkoranan uban sa yaya sa bata dihang gibahigan sa paggawas sa gate sa ilang balay.
Human sa pagpamanhig, ang duha ka mga lalaki ningdagan ug nisakay motorsiklo nga nagpaabot kanila sa unahan.
Gihulagway niini nga ang mga gunmen nakita kini sa CCTV camera sa pikas balay sa paryente sa biktima nga pulos wala magtabon sa ilang nawong.
Hinuon, usa ka kaabag sa biktima nga ilang saksi nakakita sab sa mga lalaki, ang usa niini nagbalikbalik pa sa wala pa mahitabo ang krimen.
Walay kabhang nga nakuha ang kapulisan sa crime scene hinungdan nga nagtuo sila nga revolver ang gigamit sa pagpamusil.
Si SPO1 Violango nmiingon nga sa pagkakaron, ilang gitan-aw ang angulo sa krimen nga posibling may kalambigitan sa negosyo sa biktima ug personal grudge.
Si Supt. Romeo Santander, hepe sa City Intelligence Branch (CIB) sa Cebu City Police Office (CCPO) nga nahinabi sa dySS Super Radyo nagkanayon nga gipaningkamutan nila nga pinaagi sa CCTV footage nga nakuha og mailhan ang mga lalaki.
Lakip sa susihon sa kapulisan ang koneksyon sa kaso kaniadto sa gitrabahoan nga usa ka equipment bussiness ug negosyo niini sa pagkakaron.
Sumala sa kapulisan, cooperative ang kabanay sa ilang imbestigasyon.