USA SA MGA TINUN-ANG NADASMAGAN KRITIKAL PA

USA sa tulo ka mga tinun-an sa high school nga ni- survive sa aksidente human madasmagi sa usa ka awto sa Boljoon, Sugbo naa pa sa delikadong kahimtang.

Ang 14-anyos nga si Melissa Mendez ipailawom unta sa operasyon karong adlawa aron pagtarong sa iyang nabali nga bukton.

“Dili pa siya kabuka sa iyang mata. Dili sad niya malihok iyang tiil,” sulti sa iyang inahan nga si Marciana, 47, sa Sun. Star Cebu.

Matod ni Marciana nga ang doctor gusto usab mopahigayon og computerized tomography (CT) scan kang Melissa aron matan-aw ang posibleng danyos sa iyang utok gikan sa impact.

Ang tinun-an sa second year high school naa sa intensive care unit (ICU) sa pediatrics ward sa Chong Hua Hospital sa dakbayan sa Sugbo. Gitauran gihapon siya og oxygen. Sukad nga gidala si Melissa sa ospital, si Marciana niingon nga ang iyang anak gihatagan na og tulo ka mga bag sa dugo tungod sa grabeng pagdugo.

Dunay mga samad sa iyang ulo ug lawas ang bata.

Kon sangpiton siya sa iyang inahan ug igsuong lalaki nga si Jimar, 19, kinsa maoy nag-atiman kaniya, lihukon ni Melissa ang iyang mga kamot. “Molihok siya. Makadungog ra diay siya namo,” dugang ni Marciana.

Mga classmate ni Melissa nga si Kynth Marie Mendez, 14, ug Nice Ancheta, 15, nagpaalim sa samang ospital. Naa na sila sa stable condition.

Si Marciana niingon nga di sila mopasakag kaso batok kang AlDhinier Hadjul Sanaani, 26, basta ilang abagahon ang mga bayranan sa ospital sa iyang anak.

“Gusto lang gyud ko maayo akong anak. Makabalik kon unsa siya sa una,” siya nagkanayon.

Matod niya nga ang kampo ni Sanaani nakigsulti na kanila ug nisaad nga tabangan si Melissa hangtod nga hingpit nga maulian.

Ang tulo lakip sa unom ka mga tinun-an nga naglakaw dihang nadasmagan ni Sanaani sa Brgy. Poblacion samtang siya nagmaneho sa silver Toyota Vios (TCQ 652) niadtong Huwebes sa hapon.

Ang tulo ka mga babayeng tinun-an nangamatay tungod sa grabeng impact.

Sila si Sanaani, taga Brgy. Sambag 2, dakbayan sa Sugbo, ug ang kaubang babaye nangaangol sa aksidente human malimbuwad usab ang awto.

Gikan sila sa dakbayan sa Dumaguete naghatod og mga tambal dihang nahitabo ang aksidente pagkatungod nila sa taytayan.

Ilang mga schoolmate nangamatay giilang sila si Judy Ann Lomera, 18; Cristy Marie Estella, 18; ug Joanne Marie Romero, 16. Pulos unta sila mograduate karong Marso.

Ang kapulisan, sa ilang bahin, nangandam na sa tanang mga dokumento sama sa autopsy reports ug medical certificates alang sa pagkiha kang Sanaani, usa ka medical representative.

Si SPO3 Roderick Roma, chief investigator sa Boljoon Police Station, niingon nga naghuwat na lang sila sa affidavits sa mga pamilya sa mga biktima.

Ugma, Lunes, mopasaka silag kaso batok kang Sanaani nga reckless imprudence resulting to multiple homicide and multiple physical injuries sa Cebu Provincial Prosecutor’s Office.