BAHINTING GIDAYEG SA WA PA GILUBONG

MGA pagdayeg ug pasalamat ang gipabawon sa lubong ni Capt. Jessup Bahinting, ang piloto sa nahagsa nga Piper Seneca nga giluwanan ni Interior and Local Government Secretary Jesse Robredo ug sa Nepalese co-pilot nga si Kshitiz Chand.

Gikan sa private resort nga gipanag-iya sa pamilya ni Bahinting sa Barangay San Roque, lungsod sa Ginatilan, naglakaw og kapin usa ka kilometro ang mga kabanay ug kahigalaan sa piloto paingon sa pribadong sam-ang sa Barangay Poblacion sa samang lungsod diin siya gihatod sa katapusang kapahulayan alas 4:00 kagahapon sa hapon.

Kadaghanan sa mga tawo nanghatod sa lubong kay nagsulob og puti nga t-shirt.

Mga kaubang piloto ug estudyante ni Bahinting sa Aviatour ang nagyayong sa iyang lungon pag- gawas sa lawak diin siya gihaya sud sa usa ka gabii sa ilang private resort.

Sa gipahigayon nga funeral service sa wala pa ang lubong, si kanhi senador Juan Miguel Zubiri nisaysay sa iyang mga kasinatian kauban si Bahinting.

Iyang gihulagway ang maong piloto nga usa ka maayong tawo ug matinabangon sa iyang isig ka ingon.

Si Zubiri nibalik lantaw sa pagka professional ni Bahinting sa iyang katapusang flight kauban ang maong piloto paingon sa Bantayan Island dihang iya ning giagda og inom.

Apan gibalibaran siya niini tungod kay matod ni Bahinting onduty siya niadtong higayona.

“He is one of the best pilots I’ve known,” nagkanayon si Zubiri.

Iyang gipasalig sa pamilya nga motabang siya nga dili maundang ang operasyon sa Aviatour Fly’n Inc. human gisuspenso sa Civil Aviation Authority of the Philippines (CAAP).

Gibanabanang miabot og 3,000-4,000 ang mga tawo nga nihatod sa lubong diin ang uban nila gikan sa silingang mga lungsod ug mga kauban sa pagtuo ni Bahinting sa Grace Communion International nga gikan pa sa ubang bahin sa nasod.

Samtang nagpaingon sa pribadong sam-ang ang porlon nga gikargahan sa lungon ni Bahinting, usa ka Cessna plane ang naglupad-lupad sa kawanangan sa Ginatilan nga paagi sa pagpanamilit sa namatay nga piloto.

Hugot nga gigakos ni Margarita ang lungon sa iyang bana nga gialalayan sa ilang duha ka mga anak nga sila si Jemar Rose ug Sarah sa wala pa gitumod ngadto sa nitso.