Sa Akto Sa Paglingkod
UY! avail (walay tawag), suwat sa kog balak bi. Ring… Ring… Welcome to (itago ta lang sa ngalang “chuchu”) my name is Rich. How may I help?
Sorry. I don’t hear anyone of the line. Please call us back at your most convenient time.
Yes! Ghost call (Way mitubag sa pikas linya). Ug mas motaas na pod ang oras sa akong avail.
Padayon sa balak: “Natunaw ang headset nga plantronics, midailos ang nahilis nga computer sa akong mga tudlo
ug nangaliya kanako: Mugnaa ko pagbalik. misulirap ang mga mata sa Buwan, gipilpil ang akong mga palad: Lakaw sa way paglingi ug….” Ring... Ring… Wel…
come…
to… Nabati ba ninyo ang akong pagpanghupaw? Ali, dungani ko higala!
Sa makadaghan napasmo ang akong metapora. Tuod wala man nako gilimod nga ako usa ka call center agent tekla. Di ba usa man pod tingali ka sa mitubay sa akong mga maoy kaniadto? Sa labaw napulo ka tuig nagserbisyo ko sa mga Amerikano, gikan sa ilang airline industry, computer brand, selfpublishing company ug bisag sa ilang labing dako nga banko. Nakamaestra kog kinawat-kawat nga akong gidunganan og masteral sa katitikan sa usa ka unibersidad sa Sugbo. Sa laktod pagkasulti, usa ko ka tawo nga nagaid sa panginabuhi ug matag karon ug unya molighot, moikyas aron mabuhi.
Ang pagsuwat ug pagsumiter sa akong mga mugna kang Nyor Omar Khalid maoy tinuod nakong kalipay (Mapatik man o dili. Madayeg man o maingnag: “Wa pa man gyod kay nasuwat nga tinuod nga balak, Day!”). Bahala na gyod og way tulog! Sa hapit upat na ka tuig, nahimo kong magtatampo sa labing bililhon nga literary magazine sa Sugbo, ang Bisaya. Dako ang akong pasalamat sa akong mga higala nga sila si Lei ug Jan nga mitukmod kanako aron ipapatik ang akong sugilanon. Labaw nga mapasalamaton ko kang Wanis nga anaa karon sa iyang dalan sa pagka pari nga maoy migiya kanako sa akong magkakagis ug sa kadugay nahimo nakong labing suod nga higala ug igsoon nga si Richel Dorotan (si Nyor Omar Khalid).
“Ate! Sabay tayo mag-jog bukas,” ingon ni Thea nako gabii. Si Thea usa ka Ilongga nga nurse sa Seamen’s Hospital nga kauban nakos kuwarto niining akong dormitoryo sa Intramuros. Mora lag damgo ang tanan. Niadtong Domingo nagdagan-dagan pa man ko sa soccer field sa San Roque Parish Church sa Mandaue ug karon diri na man kos San Agustin Church ug Manila Cathedral mag-agian.
Ganina, gisagpa nako ang akong kaugalingon. Dili na man diay ni damgo ang tanan. Nahinumdoman nako ang usa ka bulawanong pahimangno: “Ang Bisaya Magasin puno og sentimento. Naa sa inyong kamot ang Bisaya. Taronga ninyog dala,” ni Nyor Junnie Canizares niadtong nagkita mis Ever Gotesco. Mikidhat si Nyor Omar kanako daw nag-ingon nga salig mi nimo, Day Chelet. Makapamugnaw!
Ang akong gihunahuna sa una mao ra ang akong kaugalingon nga mga obra. Moingon na gani si Nyor Omar og payts, payter, lamia o kaha ang iyang simpleng wow mosaka na dayon ang akong kalag sa fifth dimension. Hambog na kaayo ko adtong mangasaba ni Carl Sagan kon nganong namatay man siya ug wala gyod huwata ang akong mga balak aron unta maapil sa golden record. Karon, ang akong kalipay wala ra magaid sa akong kaugalingon. Naa na kini sa mga magtatampo. Wala ra pod kini magaid niadtong mga maayo kaayo ug kusog manuyop og teknik ug kaalam sa panuwat nga morag ang among Kentoy (Kenneth Michael Baba) o Waning (Michael Florentino) kondi sa tanang magtatampo. Ang pulong nga submit o sumiter langitnon alang kanako. Mapasalamaton ko sa maong pagsalig isip staff sa Bismag. Mapasalamaton ko nga nahatagag higayon sa pagpadisog sa atong Sugboanong Katitikan hangtod diri sa kaulohan.
Usa lamang ako ka gamay ug yanong call center agent tekla. Ang Bisaya Magasin maoy mihatag og higayon nga madungog ang basag nga sonata sa akong kasingkasing— niadtong mga napasmo nga metapora. Kahibalo ko nga daghan pang parehas nako nga angay (o mas angay pa tingali) niining lingkoranan nilang Marcel Navarra, Junnie Canizares o Narcing Caparoso. Sama nila ni titser, driver, banker, reporter, prosti, tambay, adik; mga tawong nakadawat nga sila ignorante sa ubang suok sa kinabuhi; mga abli og hunahuna; mga mapaubsanon sa uniberso; mga moulpot sa kanindot sa sapa nga miawas sa kanal. Ug kining tanang klase sa tawo gusto nakong hatagan og dungog niining akong gilingkoran.
Daghan pa kog angay kat-onon niining kinabuhia. Daghan pa pod tingali kog sayop nga mabuhat. Di ko perpekto ug mapasalamaton ko sa tanang leksiyon. Mayukboon ko sa gihatag nga higayon. Mayukboon ko sa kagawasan nga mabuhi. Ako si Richellet Potot Chan, sulugoon sa Sugboanong Katitikan. –