pagbasura sa kaso nilang espinosa, lim ug co tukion ni duterte

MIINGON si Philippine National Police (PNP) Chief Dir. Gen. Ronald “Bato” dela Rosa nga tukion ni Presidente Rodrigo Duterte ang kaso sa mga gitumbok nga drug lord nga sila si Kerwin Espinosa, Peter Lim ug Peter Co nga gibasura sa mga prosecutor sa Department of Justice (DOJ).

“He (President Duterte) told me that he is going to review. He is going to use his power to review over resolutions coming out from the DOJ especially resolutions dismissing drug cases,” pahayag ni dela Rosa human sila magkasulti si Duterte atol sa graduation ceremony sa Philippine Military Academy (PMA) sa Baguio City dili pa lang dugay.

Miangkon si Dela Rosa nga nasugmoy ang 185,000 ka polis sa pagbasura sa DOJ sa drug case sa tulo ka drug lord ug uban pa. Hinuon, maisip usab kini nga wake-up call alang kanila aron mas higpitan pa nila ang ilang trabaho.

Kahinumdoman nga giaprobahan ni Acting Prosecutor General Jorge Catalan kaniadtong Disyembre 20, 2017 ang resolusyon nga nag-ingon nga dili mahimong himoong lig-on nga ebidensiya ang mga pahayag sa drayber ug badigard ni Espinosa nga si Marcelo Adorco kay kuno sulod-guwa ang mga pahayag niini.

Nasuko si Duterte sa pagka- dismiss sa kaso busa gibaharan niya si Justice Sec. Vitaliano Aguirre nga ipuli kini niya kang Espinosa sa presohan.

Miingon si Bato nga mihubag kuno ang kamot ni Duterte human sumbaga niini ang bungbong sa Malacañang sa pagkahibawo niya nga gibasura sa DOJ ang kaso sa tulo ka giingong drug lord. Pero misukwahi niini si Presidential Spokesman Harry Roque. Matod niya, wala niya makita nga mihubag ang kamot ni Digong.