SAM MILBY UG YASSI PRESSMAN

May Sekretong Romansa Na Kaha?

HON ang imong lovelife kanunay lang nga nahimutang sa ikatulong ligid ug unya ikahimamat mo ang usa ka lalaki nga ingon kaguwapo ni Sam Milby, palabyon mo ba ang dakong kahigayonan? Kini ang pangutanang naghagit kang Yassi Pressman silbing usa ka babaye nga kanunay lang nahimutang nga ikatulong ligid sa pelikulang “Ang Pambansang Third Wheel”.

Kining maong lilas usa ka romcom nga giprodyus sa VIVA Films ug The Idea First Company. Si Trina nga gidala ni Yassi, usa ka receptionist nga nahimong copywriter sa usa ka advertising agency. Aktibo kaayo siyag panghunahuna ug nagtuo nga ang matag tawo makahimamat ra og tawo nga ikauban niya sa pagbaktas sa kinabuhi. Si Trina nga 30 anyos na kinahanglang makakaplag og usa ka tawo para kaniya. Katulo na hisakiti ang iyang dughan ug akseptado siya nga sa ikatulong ligid na siya sa iyang pagpakig- date. Nanumpa siya nga kinahanglan dili na siya mahipunta sa lalaki nga dili maoy tubag sa iyang kagustohan.

Sa laing bahin, si Sam sa karakter nga si Neo, usa ka art director ug maoy gikauban ni Trina sa usa ka proyekto sa advertising. Gawas sa iyang kaguwapo, may himatikdan si Trina nga maoy nakalumpag sa bungbong nga iyang giali aron kapanalipdan ang iyang kasingkasing. Admitado si Neo nga tulo na ka babaye ang iyang gihigugma apan ang iyang gitug-an nga aduna siyay otso anyos nga anak nakagun-ob sa dughan ni Trina. Ug ang nakagrabe alang kang Trina mao nga ang inahan sa otso anyos nga bata nakigkita pa kang Neo. Ang nagdala sa papel ni Murphy nga anak ni Neo, mao si Alonzo Muhlach, samtang si Monica, kanhi asawa ni Neo, gidala ni Sam Pinto. Ubos sa direksiyon ni Ivan Andrew Payawal, ang lilas nakakuha og positibong reaksiyon sa internet gumikan sa estorya niini ug kemistri sa nag-unang mga bida nga una nang nagkauban sa pelikulang “Camp Sawi”. Sa iyang pagpatin-aw sa karakter ni Yassi, si Payawal nga mao usab ang nagsulat sa eskrip, nagpahayag: “Gusto niya s’ya iyong priority pero dahil in-accept n’ya itong lalaki na ito sa buhay n’ya, kailangan n’yang mag-adjust.” Dili pa lang dugay, si Yassi ug Sam nagpaukyab sa publiko sa ilang pagpakita nga sila nagginaksanay. Unya ra ba, gidayeg pag-ayo ni Yassi ang iyang leading man. Dili kuno lisod nga pakig-ubanan ang aktor tungod sa naghingapin nga kabuotan niini. Labaw sa tanan, ang gusto kaayo niya sa Fil-Am nga aktor kay kanunay kining magpakaon sa ilang set. Daghan na hinuon kuno ang nangutana kon ‘di raw kaya madevelop siya sa actor tutal pareho naman silang loveless?’ Apan kusog nga namalibad si Yassi. Unya ra kuno ang love. Unahon kuno una niya ang karera. Dili kuno lisod higugmaon si Sam apan sa pagka karon, karera kuno una. Si Yassi anak sa amahang Briton ug Pilipina nga inahan apan didto siya matawo sa Hongkong. Usa pa siya ka bata nga nagsugod sa pag-artista. Dili siya ordinaryong aktres sanglit maayo usab siyang mokanta ug mosayaw gawas pa nga usa usab siya ka modelo. Sa pagsulat niini, gisalida na sa tibuok nasod ang “Ang Pambansang Third Wheel”.—