Mga kontra Cha-Cha sumugod sa Kamara

Sinalubong ng kilos-protesta kontra Charter Change ng daan-daang raliyista mula sa labor groups at cause-oriented organizations ang pagbubukas ng Kamara nitong Lunes.

Tinawag nila ang Cha-Cha na “worst man-made calamity” na tatama sa mamamayang Pilipino lalo na’t nakatakdang talakayin ng House of Representatives ang Concurrent Resolution No. 1 na ipinakilala ni Cagayan de Oro 2nd District Representative Rufus Rodriguez.

Ang nasabing resolusyon ay nagpapanukala ng mga pag-amyenda sa 1987 Constitution, kabilang ang pagpapalawig sa termino ng mga mambabatas, at lokal na mga opisyal, pagbaligtad ng protectionist economic provisions by mere legislation, at pagtataas ng Senate membership mula 24 sa 27, na kakatawan sa siyam na rehiyon.

Ang nasabing amendment sa komposisyon ng senado ay pagsisimula umano ng isang ‘federal form of government.

Ang rally ay inorganisa ng labor coalition na PAGGAWA o Pagkakakisa ng Uring Manggagawa, kasama ang kanilang kaalyado mula sa Sanlakas at Partido Lakas ng Masa (PLM).

“Kaninong kinatawan ang mga kongresistang ito, na habang abala ang taumbayan kung paano tutulungan ang mga nasalanta ng bulkang Taal ay inuna pa ang pansariling interes ng kanyakanyang mga angkan?” pahayag ni Ka Leody de Guzman, tagapagsalita ng PAGGAWA labor coalition at chair ng

Bukluran ng Manggagawang Pilipino.

Ayon kay De Guzman, hindi kinakatawan ng mga kongresista ang mga tao lalo na sa maraming manggagawa at mahihirap. Sa halip, kinakatawan lamang ng mga ito ang interes ng kanilang political clans at ng mga dayuhang kapitalista.

“Imbes na unahin ang kapakanan ng libu-libong nasasalanta ng sakuna gaya ng pagpapataas sa calamity fund at muling pagpapagana sa Project NOAH, ang mauuna pa sa adyenda ng Batasan ay ang pagpapahaba ng termino para mas matagal nilang mapakinabangan ang kaban ng bayan. Ang lakas ng loob at kapal ng mukha! Our lawmakers have the gall to call themselves the representatives of the people even if all they think about is how to preserve the dominance of their families in their respective feifdoms,” dugtong ni Ernie Arellano ng National Confederation of Labor (NCL).

Nagbanta ang mga grupo ng mas marami pang kilos portesta laban sa Chacha sa mga susunod na linggo.