Traffic enforcer, kalaboso sa ‘lagay’
Kalaboso ang isang traffic enforcer ng Metro Manila Development Authority (MMDA) nang umano’y maaktuhan ng isang pulis na nanghihingi ng P20 sa mga nagdaraang pampasaherong bus sa southbound lane ng Epifanio delos Santos Avenue (EDSA) sa Barangay Wackwack, Mandaluyong City, nitong Miyerkules ng gabi.
Kasong paglabag sa Republic Act 6713 o Code of Conduct and Ethical Standards for Public Officials and Employees at RA 3019 o Anti-Graft and Corruption Practices Act ang nakatakdang isampa laban sa suspek na si Rodrigo Maghanoy, 47, na traffic enforcer ng MMDA, sa piskalya.
Sa report ng Mandaluyong City Police, inaresto ang suspek sa southbound lane ng EDSA, tapat ng isang shopping mall sa Bgy. Wack-Wack, dakong 8:20 ng gabi.
Nauna rito, naka-duty umano ang suspek at nagmamantine ng daloy ng trapiko sa lugar nang mapuna ni P/SSgt Joselito Capito, na sakay ng kanyang mobile, ang pagpila ng mga pampasaherong bus sa harapan ng isang gusali doon na nagdudulot nang pagsisikip ng daloy ng trapiko.
Dahil dito, bumaba ng mobile ang pulis at napuna na ang mga konduktor ng mga naturang bus ay pasimpleng naghuhulog ng tig-P20 sa isang plant box na malapit sa motorsiklo kung saan nakaparada ang motorsiklo ng suspek.
Sinasabing kapalit ng naturang halaga ay pinapayagan ng suspek ang pagbalewala ng mga pampasaherong bus sa batas-trapiko at pagpila sa lugar upang kumuha ng pasahero kahit nagreresulta ito sa masikip na trapik.
Nang makita ng pulis na nagtungo ang suspek sa plant box at kinolekta ang mga nakalamukos na perang papel ay kaagad na itong inaresto.
Nakumpiska sa suspek ang 13 pirasong P20 bills na may kabuuang halaga na P260.