Michael Angelo Lobrin, dapat bigyan ng talk show sa mainstream TV
ISA sa mga inaabangan naming mapunta sa mainstream television si Michael Angelo Lobrin, ang gifted communicator na naging battered child, street vendor, sakristan, naging scholar sa seminaryo ni Sen. Edgardo Angara, at ngayon entrepreneur, author, comedian, producer at consultant ng maraming congressman at senators.
Uplifting at endearing ang humor ni Michael Angelo kaya may niche siyang natagpuan sa local entertainment industry. Umabot na sa 13th season ang kanyang #MichaelAngelo The Sitcom sa GMA News TV na laging loaded ng sponsors. Magsisimula ang bagong season ng show sa Enero 27, Linggo. Satisfied ang Bounty Fresh, Chooks To Go, Uling Roasters, Hanabishi, Bon Appetea, Owwe, Reyal, Papa Dans, RC Cola, Skin Magical, JGX at PCSO kaya hindi bumibitiw ang mga ito sa kanyang show.
“Sa awa po ng Diyos at tulong ng mga sponsors, umabot na po sa Season 13 ang sitcom at siyempre po may mga bagong katatawanan, bagong kuwento na kaiibigan ng ating mga sitcom follower at siyempre mga karakter na magbibigay ng katotohanan sa buhay at mga inspirasyon. Lumalaki po ang pamilya at iyon po ang pangarap natin, walang nawawala kundi nadadagdan kasi mas masaya kung marami. Kaya nagpapasalamat po ako sa mga artistang nakasama namin sa matagal na panahon, hindi kami iniwan,” kuwento ni Michael Angelo nang humarap sa presscon kamakailan. Regular cast ng #MichaelAngelo: The Sitcom sina Derek Monasterio, Bentong Sumaya, Janver, May Bautista, Lovely at iba pa.
“Hindi lang po sa hapon ito mapapanood, may replay din po sa gabi at may bonus pa at sana po matuloy na magkakaroon ng #Michael Angelo Lenten Reflections sa umaga. Kaya mapapanood na sa umaga, hapon at gabi.”
May game show rin siyang sisimulan na ang konsepto ay pinaghalong
Eat Bulaga at
Wowowin.
“Hindi po kami mahihiyang sabihin na iyon po ang tinitingnan namin pero itwi-twist lang po namin, puwede pong sabihin na combination ng ‘Eat Bulaga’ at ‘Wowowin’. Siyempre hindi naman po namin gagayahin sila kasi mas mahusay po sila, pero may gano’ng touch kasi ang balak po namin, game show with variety show na may kumakanta, may sumasayaw kasi gusto kong i-maximize po ‘yung talent ng aking mga artista kaya may game show at variety show po.”
Walang conflict sa Eat Bulaga at
Wowowin ang kanyang game show.
“Nasa GMA News TV naman po kami, so hindi po kami pareho ng network. In fact sila nga po inspirasyon namin at nakita namin kung paano sila nakapapagpasaya sa mga tao. But this time sa GMA News namin gagawin.
Dahil likas na mahusay magsalita at matulungin, sa katunayan ay persons with disability at masa ang nakikibang sa pagbebenta ng kanyang mga produkto, kaya inusisa siya ng mga katoto kung may ambisyon siyang pumalaot sa pulitika.
“Marami nga pong nagtatanong sa akin kung magpupulitiko ako, ang mga Lobrin po ay pulitiko sa Batangas, ang lolo ko po ay congressman dati sa Lipa. Pero sa ngayon po wala akong balak.
“Ang isang trabaho ko po ay adviser po ako ng mga pulitiko, ghostwriter, speech writer at ang hawak ko po ngayon, siyam na Senador, 30 congressmen at apat na gobernador. So, consultancy lang
po ako, medyo magaling po ako sa branding.
“Kung may kakilala po kayo sa Isabela, ako po ang gumawa ng tagline na ‘Masayang masiglang nagkakaisa ang Isabela’ ni Governor Bojie Dy. Medyo busy po ako, pero ngayong malapit na ang eleksiyon, ilan lang po ‘yung tinulungan ko nang patahimik.
“Although I’m into politics, malinaw po ang values ko, I always tell my clients politicians na at the end of the day it’s still about public service.”
May biniro raw siyang kaibigang kongresista.
“Tsinek ko ang distrito niya, ‘Ito lang ang programa mo, Oplan Tule,’ sabi ko, ‘Congressman, tumigil ka na, wala nang balata ang mga tao d’yan. Gumawa ka ng matibay na programa,” nakakaaliw na kuwento ni Michael Angelo.
Inspirational speaker din siya na madalas imbitahin ng Top 1000 Corporations sa Pilipinas.
“Kung hindi po tao ang mga empleyado mo, idadaan mo sila sa akin, gagawin ko silang matitinong workers,” may himig pagbibirong sabi niya.
Credible na manghikayat si Michael Angelo sa ating mga kababayan para pumasok sa small business, dahil napapalago niya ang kanyang mga negosyo. Ang isa sa mga bago niyang negosyo ay ang Simply Suka na itinitinda ng vertically challenged nating mga kababayan.
“Kaya kung makikita n’yo kami, ako ang hari ng mga dwarfs,” birong sabi pa niya.
Malaki na ang production ng Simply Suka at lalo pa itong magiging visible sa market dahil may kontrata siya para itinda ito sa lahat ng Chooks To Go outlets.
Si Michael Angelo Lobrin ang kinakailangang magkaroon ng talk show sa mainstream TV, tiyak na marami ang mai-inspire sa mga kuwento niya. Rapido ang bibig niya, effortless na nakakatawa, pero kahit saang paksa ibaling ang usapan, laging may sense ang mga sinasabi niya.