Carpio, ayaw maging Chief Justice
TALAGANG ayaw ni Acting Supreme Court Chief Justice Antonio Carpio na tanggapin ang nominasyon para sa posisyon ng Punong Mahistrado na nabakante nang ma-quo warranto si exSC Chief Justice Ma. Lourdes Sereno.
Sa isang-linyang liham sa Judicial Bar Council (JBC), pormal niyang tinanggihan ang panawagang tanggapin ang automatic nomination para sa puwesto ng pinatalsik na si Sereno. Kinumpirma niya na tinanggihan niya ang nominasyon bagamat masigasig sina ex-SC Chief Justice Hilario Davide Jr. at Integrated Bar of the Philippines (IBC) sa pagsuporta sa kanyang nominasyon.
Makalawa nang na-bypass si Carpio sa puwesto noong panahon nina ex-Pres. Gloria MacapagalArroyo (2010) at ex-Pres. Noynoy Aquino (2012). Si Renato Corona ang nahirang na Chief Justice noong panahon ni Arroyo samantalang si Lourdes Sereno ang napiling Punong Mahistrado noong panahon ni Aquino.
May nagtatanong kung bakit ayaw tanggapin ni Carpio ang nominasyon. May naghihinala na baka kaya ayaw niyang tanggapin ito ay dahil tiyak naman na hindi siya ang pipiliin ni Pangulong Rodrigo Roa Duterte, sapagkat very vocal siya sa pagpuna sa Pangulo sa pagwawalang-kibo sa pag-okupa ng China sa teritoryo ng Pilipinas sa West Philippine Sea kahit ang bansa ang nanalo sa kaso sa Arbitral Court noong 2016.
May nagkokomento naman na ayaw niya ng gulo dahil sakaling siya ang mahirang na SC Chief Justice, tiyak na makakabangga niya si PRRD at ayaw niyang siya ay tinatakot. Ayaw niyang baluktutin ang batas at palambutin ang hudikatura.
Samantala, hindi naman laging pagpuna kay PRRD ang ginagawa ni Carpio. Pinuri niya ang Pangulo sa pangako nito na ipagtatanggol ang soberanya ng ‘Pinas sa WPS. Ang pangako ni Mano Digong ay nakalaman sa kanyang ikatlong State of the Nation Address (SONA) noong Hulyo 23 sa Joint Session ng Kongreso.
Tama raw ang paninindigan ni PDu30 nang sabihin niyang poprotektahan niya ang interest ng bansa sa WPS. “That’s the correct position. We should never give up our rights there.” Katig din siya sa pahayag ng Pangulo na maaari pa rin tayong maging kaibigan ng China nang hindi hindi isusuko ang ating territorial claims laban sa dambuhalang bansa.
“Puwedeng ma-reconcile ito. Maaaring magpatuloy ang pakikipagkalakalan natin sa China habang ipinagtatanggol ang ating sovereign rights.” Sinabi ni Carpio na may iba pang mga relasyon ang PH sa China bukod sa kalakal at negosyo, tulad ng ugnayang-kultural, at iba pang mga bagay.
Ngayon ay si dating pangulo at Pampanga Rep. Gloria MacapagalArroyo na ang Speaker matapos sipain ng mga kongresista si Davao del Norte Representative Pantaleon Alvarez. Kapag isinulong ni GMA ang Charter Change tungo sa pederalismo at “naamoy” ng mga senador na plano raw niya na maging Prime Minister, hahadlangan nila ito upang hindi na makabalik sa kapangyarihan si Aleng Maliit.