Naya Rivera, lusot na sa kasong domestic battery
OPISYAL
nang nalusutan ng aktres na si Naya Rivera ang kulungan kaugnay sa pagkakaaresto sa kanya dahil sa kasong domestic battery noong Thanksgiving holiday.
Ang dating Glee star ay kinasuhan ng misdemeanour matapos umanong hampasin sa ulo ang asawang aktor na si
Ryan Dorsey nang mag-away sila noong Nobyembre 25, habang nagbabakasyon sa mga kamag-anak sa West Virginia kasama ng anak nilang si Josey.
Pinakawalan si Naya nang magpiyansa ng $ 1,000, at nitong unang bahagi ng Disyembre ay naghain ng diborsiyo laban kay Ryan – dalawang buwan makalipas ang boluntaryong pagbawi sa una niyang petisyon noong 2016 para wakasan ang kanilang kasal.
Noong huling bahagi ng Disyembre, iniulat na nagkaroon ng temporary agreement ang dalawa para paghatian ang legal at physical custody ng dalawang taong gulang na si Josey, at bilang bahagi ng settlement, pumayag si Ryan na iurong ang kasong kriminal.
Ayon sa TMZ.com, ang kaso ay pormal na ibinasura ng mga opisyal sa Kanawha County Magistrate Court’s office sa West Virginia nitong Biyernes.
Kinumpirma ng prosecutors na isinara na nila ang kaso, dahil nilinaw ni Ryan na hindi na niya itutuloy ang kaso laban sa dating asawa.
Ikinasal sina Naya at Ryan noong 2014, ilang linggo lamang matapos putulin ni Naya ang kanyang engagement sa rapper na si Big Sean.