– Det er litt vemodig
Bø kommunestyre er no historie. Ordførar Borgar Torbjørn Kaasa (Sp) svinga klubba for siste gong måndag kveld.
– Det er litt vemodig, seier den avtroppande ordføraren til Varden. Han har no 15 dagar igjen i jobben som bygdas øvste politiske leiar.
Frå årsskiftet er det Midt-Telemark kommune, med partifelle Siri Blichfeldt Dyrland som ordførar.
Den siste
Kaasa dvelte i ei tale til dei folkevalde litt ved historia. Det fyrste kommunevalet vart halde på tinget 8. september 1837 på lensmannsgarden Kleppen, og leiaren var futen Borschenius. Valet var alt anna enn hemmeleg – dei røysteføre i bygda måtte seie klart frå om kven dei ville ha til formann.
Det fyrste formannskapsmøtet vart halde på Grivi 3. februar 1838. Gjermund Halvorsen Eikjarud var den fyrste leiaren av formannskapet, frå 1838–1839.
Heime hjå ordføraren
Det fyrste heradsstyret (kommunestyret) var i perioden1840-1841, også med Eikjarud som leiar.
Møtestaden framover, både i formannskap og heradsstyre, var i heimen til ordføraren.
Den fyrste rekneskapsføraren, Anders K. Eikja, fekk jobben fordi han kravde lågast løn
– 15 spesidalar i året. Etter to år orka han ikkje meir. Etterfølgjaren Ole P. haugen fekk 1 spesidalar ekstra for papir.
– Eg tenkjer med gru på å ha kommunestyre med alle 25 i heimen og ordne med servering, sa Borgar Kaasa i tala. Han takka for tilliten og det han fekk oppleve i dei 14 månadene som ordførar.
God attest
Det siste møtet skjedde i ein ny og flott kommunestyresal i det 62 år gamle bygget.
Heile huset er renovert for over 30 millionar kroner. Fleire folkevalde gav uttrykk for at resultatet er blitt framifrå. Huset vil bli offisielt opna 3. februar 2020. Den veka vil alle interesserte bygdefolk få guida oppvisning i bygget.
Fekk takk
Hans Aasmund Saga har hatt ei sentral rolle ved renoveringa av det kvite huset.
Han vart takka med blomar og godord av ordføraren for den utførte jobben.
– Bøheringane er stolte av det kvite huset, og det skal me ikkje kimse av, sa Borgar Torbjørn Kaasa.