Får ny gullreklame
Telemark får ny gullreklame på TV. Denne veka har NRK-programmet «Norge nå» tre sendingar frå fylket vårt.
Solfrid Leirgul Øverbø skal vere reporter i alle tre sendingane frå Skien, Bø og Seljord.
– Eg gler meg veldig. Målet med programmet er at sjåarane skal bli litt klokare og me skal finne dei gode historiene - frå heile landet til heile landet, seier den blide røysta frå NRK på Borgeåsen.
Framtidsheimen
Skien er fyrste stoppestad med sending i kveld. Solfrid Leirgul Øverbø fortel at basen blir i ein heim hjå ein person med mange tekniske «duppedittar».
Vidare blir det innslag frå skaparverkstaden på Skogmo vidaregåande skule. Temaet i denne sendinga blir framtidsheimen, og korleis teknologien både er hjelpemiddel, påverkar vanane våre, kvifor nokre er redde teknologien og kva ein bør tenkje over.
Elgjakta startar
Lifjellstua i Bø er basen for sendinga tysdag kveld - den dagen elgjakta startar i delar av fylket vårt, blant anna i Bø. Rekruttering til jakt, med tidenes satsing for å få fleire kvinner ut i skogen med børsa, vert mellom temaa i denne sendinga frå Bø.
Konsekvensar viss me ikkje jaktar, skrantesjuke mv. vert tema i sendinga som etter planen skal gå frå utsida av Lifjellstua. Det blir også intervju med ein jegerfamilie frå distriktet.
300.000 sjåarar
– Blir det mykje PR for Lifjellstua, Solfrid?
– Dei får vise seg fram på beste sendetid i NRK. Programmet har kring 300.000 sjåarar, svarar Solfrid Leirgul Øverbø.
Gunhild Grav, Sandra Kallestad og Ann Kristin Skogen stråler over at NRK har valt ut Lifjellstua.
– Dette er gull for Bø, Lifjell, Telemark og oss, seier Gunhild Grav.
Onsdag er det ikkje sending, men torsdag kveld dukkar «Norge nå» opp ved Seljordsvatnet.
Det mystiske dyret
Der vil sjølvsagt sjøormen vere tema - dyret som har skapt mystikk rundt denne innsjøen sidan det fyrste gong dukka opp på 1700-talet.
Mytane rundt sjøormen, videoklipp, kva har folk sett og menneske som trur på sjøormen er nokre av innslaga frå denne bygda.