Fulle av lovord om Rauland
Hytteeigarane er fulle av lovord om Rauland som feriestad.
I ei fersk undersøking, der 1.188 hytteeigarar svara, seier 93 prosent at dei er godt fornøgd eller svaert godt fornøgd med å ha feriebustad i fjellbygda. Det var dagleg leiar Marie Bergsli i selskapet Mimir som la fram tala på eit ope møte på Raulandsakademiet onsdag kveld. Undersøkinga vart gjennomført via epost.
Naturen viktigast
– Hytteeigarane set mest pris på naturen/terrenget, at det er stille, gode skiløyper og bygda er eit snøsikkert område.
Dei svarar vidare at dette er ei vakker og triveleg fjellbygd med saerpreg og hyggjelege menneske, opplyste Bergsli til dei mange frammøtte. Ho er overvelda over den store svarprosenten og at så mange bruka tid på dei ulike spørsmåla.
Ifølgje undersøkinga kjøpte 90 prosent hytte i bygda på grunn av naturen. 85 prosent svara at langrennsløyper var viktig ved kjøpet. Bergsli seier til Varden at svaert mange av dei som har svara bur i Grenland.
Dette kan bli betre
Hytteeigarane har også sagt sitt om det som kan bli betre i fjellbygda: Hytteutbygginga må bli meir varsam og dei trafikale forholda betre. Dei ønskjer vidare betre markering av sommarløyper og enda fleire nye langrennsløyper. Eit anna ønske er modernisering av heisanlegget ved Rauland skisenter samt betre serverings- og mattilbod i sentrum.
Viktig for bygda
Undersøkinga omfatta òg innbyggjarane. Her kom det inn 423 svar, og 70 prosent av desse bur i Rauland.
– Generelt er innbyggjarane positive til reiselivsnaeringa. Over 85 prosent meiner at den har stor eller svaert stor betyding, sa Marie Bergsli ved presentasjonen.
Raulendingane set òg mest pris på naturen, ro og stille, eit mangfaldig friluftsliv, godt kulturtilbod og bra lokalt samhald, ifølgje undersøkinga.
Rivande utvikling
Seniorplanleggar Sissel Mjølsnes i Asplan Viak la fram tal som syner den enorme utbygginga i det som vert kalla Rauland nord - frå Austbø og forbi Vierli.
– I 1980 var det 238 fritidsbustader i dette området. Det neste tiåret kom det 73 hytter og så 166 hytter frå 1990–2000. Etter tusenårsskiftet har det kome heile 1.364 hytter. Den store utbygginga har skjedd i Holtardalen, sa Sissel Mjølnsnes.
Området Rauland nord har i dag 1.841 fritidsbustader.