Barnevern med millionsprekk
Budsjettet for Midt-Telemark Barnevern sprakk med tre millionar kroner i løpet av få veker. – Den økonomiske styringa har vore ute av kontroll. Slik kan me ikkje ha det. Derfor har me kravd full gjennomgang av den økonomiske styringa i etaten, opplyser Bø-ordførar Olav Kasland til Varden.
Gjeld Bø
Han fortel vidare at den økonomiske sprekken gjeld for Bø.
– I tertialrapporten som kom i september heitte det at budsjettet for tiltak til barn i Bø var i balanse. To veker etterpå fekk me beskjed om at det i staden blei ein minus på tre millionar kroner. Denne sprekken kom trass i at det ikkje hadde blitt sett i verk ekstra tiltak mot nye barn, opplyser Bø-ordføraren vidare.
Vanvittig mykje
Han legg ikkje skjul på at den økonomiske sprekken tyngjer for Bø kommune.
– Dette er vanvittig mykje pengar. Meirforbruket svekkar resultatet, for dette går rett på botnlina. Eg er ikkje fornøgd i heile teke, og talar her på vegne av både formannskap og kommunestyre i Bø, seier ein frustrert ordførar Olav Kasland.
Full gjennomgang
Sauherad er vertskommune for Midt-Telemark Barnevern, og rådmann Hans Erik Utne har såleis det administrative ansvaret.
– Me har no full gjennomgang, for å unngå at dette skal skje igjen, seier Hans Erik Utne i kommentaren sin til Varden.
Han fortel at kommunen har ein intern sjekk forholda, og han lovar å kome tilbake til politikarane i Bø med opplysningar når ein har funne ut kor feilen ligg.
I søkelyset
Midt-Telemark Barnevern har tidlegare i år vore i søkelyset. Institusjonen fekk mellom anna kritikk frå Fylkesmannen i Telemark, noko som er omtala i store oppslag her i avisa.
– Ein rapport som var til handsaming i Midt-Telemarkrådet 23. september syner at barnevernet no fungerer bra. Etaten har fått ned fristoverskridingane, seier Hans Erik Utne. Utne avviser at etaten er ramma av interne konfliktar, men seier at den har høgt sjukefråver.
Kan få ned kostnadene
Det var Skagerak Consulting som gjekk gjennom barnevernet for Midt-Telemarkrådet. Rapporten konkluderer med at etaten har ein god praksis i behandlingsaksen, men seier vidare at med fokus på heilskaplege løysingar kan kommunane få ned totalkostnadene i MidtTelemark Barnevern.